Champions League/ Pas 14 vitesh, Liverpul kampion i Evropës

Liverpuli është fituesi i madh i Champions League për këtë edicion. Të kuqtë mposhtën pastër me shifrat 0-2 Totenhemin, në një finale që nuk dhuroi shumë emocione, raporton Panorama.

Finalja nisi rrufeshëm, që në sekondën e 23-të, u akordua një penallti për Liverpulin, pas një prekje me dorë të Sisoko. Arbitri Skomina ishte i sigurt, dhe dha penallti, të cilën nuk e gaboi Salah.

Me kalimin e minutave, Totenhemi u përpoq të reagonte, por ekipi i Klop e menaxhoi mirë situatën, duke mos e vënë në asnjë moment në rrezik rezultatin.

Me fillimin e pjesës së dytë, Klop lëvizi dhe bëri dy ndërrime të shpejta, duke i dhënë më shumë freski skuadrës. Edhe Poçetino bëri ndërrimet e tij, por sërish nuk arriti dot të thyejë portierin Alison.

Ndeshja u vulos në minutën e 87-të, ku Origi shënoi pas një goditje të fortë, dhe çliroi të gjithë tifozët e Liverpulit, që rikthehen të fitojnë një finale Champions League, pas plot 14 vitesh, që nga ajo finale e fituar me penallti ndaj Milanit.

Totenhem-Liverpul 0-2

FORMACIONET

Totenhem: Loris, Tripier, Alderuajreld, Vertonghen, Rouz, Ali, Sisoko, Uinks, Son, Eriksen, Kejn. Trajner: Mauricio Poçetino.

Liverpul: Alison, Arnold, Matip, Van Dijk, Robertson, Henderson, Fabinjo, Uajnaldum, Salah, Mane, Firminjo. Trajner: Jurgen Klop