Çmimet po frenojnë, por numri i pronave të shitura u rrit me 23% 

Numri i transaksioneve në tregun e pasurive të paluajtshme u rrit me 23% në gjashtëmujorin e parë të këtij viti.

Sipas të dhënave të detajuara të vrojtimit “Tregu i pasurive të paluajtshme dhe indeksi i çmimit të banesave”, i Bankës së Shqipërisë, numri total i pronave të shitura në gjashtëmujorin I 2023 ishte 1150, nga 933 që ishte një gjashtëmujor më parë.

Gjithashtu, numri mesatar i pronave të shitura për subjektet që iu përgjigjën anketimit të Bankës së Shqipërisë u rrit në 6.7, nga 5 që kishte qenë në gjashtëmujorin e dytë të vitit të kaluar.

Pyetësorit të Bankës së Shqipërisë për gjashtëmujorin e fundit iu përgjigjën 172 shoqëri ndërtimi dhe agjenci të pasurive të paluajtshme.

Koha mesatare e shitjes së banesave në rang vendi raportohet të jetë mesatarisht 10.6 muaj, duke u rritur lehtë ndaj vlerës 10 muaj në gjashtëmujorin e kaluar.

Në rastin e Tiranës koha mesatare e shitjes së banesave nuk shfaqi ndryshime të mëdha, ndërsa qytetet bregdetare dhe të tjerat kanë raportuar kohëzgjatje më të lartë se periudhën e kaluar.

Agjentët raportojnë numër të pandryshuar banesash të regjistruara në librat e tyre. Balanca neto mes atyre që raportojnë rritje të numrit të banesave të regjistruara dhe atyre që raportojnë rënie të numrit të tyre, ishte thuajse neutrale me -0.6%, ashtu si në periudhën e kaluar.

Balanca neto ishte identike edhe për pronat tregtare. Sipas Bankës së Shqipërisë, vlen të theksohet fakti se 83% e përgjigjeve kanë qenë neutrale, ndërsa ato të formës “më shumë/më pak” përbënin një pjesë të vogël të tyre.

Numri i pronave të pashitura, si për banesat, ashtu edhe për godinat tregtare, ka shënuar rënie. Balanca neto për numrin e pronave të pashitura ka vijuar të regjistrojë vlerë pozitive dhe ky fenomen ka nisur të vërehet që prej fillimit të vitit 2016. Kjo ecuri tregon se numri i pronave të pashitura ka shënuar rënie të vazhdueshme në secilin nga gjashtëmujorët e kësaj periudhe.

Mbi 60% e agjentëve kanë realizuar shitje me çmim të njëjtë ose deri në 5% më pak sesa çmimi i kërkuar, çka mund të jetë një tregues i kërkesës së lartë nga ana e blerësve. Pjesa tjetër kanë raportuar që kanë realizuar shitje me një çmim midis 5% deri në 20% më të ulët nga çmimi fillestar i kërkuar.

Sipas agjentëve, rreth 40% e pronave për banim dhe e atyre për përdorim tregtar të shitura prej tyre janë blerë me hua bankare. Nga këto, në 85% të rasteve, kredia ka mbuluar deri në 60% të vlerës.

Të dhënat e vrojtimit të Bankës së Shqipërisë tregojnë se tregu i pasurive të paluajtshme ngelet ende dinamik, pavarësisht ciklit të rritjes së normave të interesit që nisi vitin e kaluar.

Sipas indeksit Fischer të Bankës së Shqipërisë, çmimi mesatar i banesave të shitura gjatë periudhës është rritur me 11.6% në krahasim me gjashtëmujorin e kaluar dhe mbetet thuajse i njëjtë në krahasim me një vit më parë.

Një ecuri e ngjashme është vërejtur edhe për kryeqytetin. Indeksi i çmimeve për shitjet në Tiranë regjistroi një ngritje prej 13.3% ndaj periudhës paraardhëse duke mbetur edhe ai në nivelin e një viti më parë.

Gjithashtu, agjentët raportojnë rritje të kërkesës për qiramarrje, si për banesa, ashtu edhe për prona tregtare dhe çmimet e qirasë kanë shënuar rritje. Aktiviteti i dhënies dhe marrjes së pronave me qira është i përqendruar në rajonin e kryeqytetit dhe veçanërisht në zonën e qendrës./Monitor/