Dëbimi i diplomatit nga Shqipëria, MPJ e Rusisë: Provokim! S’do mbetet pa përgjigje…

Pas vendimit të Shqipërisë për dëbimin e diplomatit rus, Alexey Krivosheev, ka reaguar Ministria e Jashtme e Rusisë duke kërcënuar se ky hap nuk do të mbetet pa përgjigje.

Zv/Ministri i Jashtëm rus, Alexander Grushko, tha për median shtetërore ruse, RIA-Novosti, se Rusia do t’i përgjigjet Shqipërisë për këtë vendim të marrë, të cilin e cilësoi si provokim.

“Ky është një provokim i qartë që synon përkeqësimin e marrëdhënieve ruso-shqiptare dhe natyrisht ky hap jomiqësor nuk do të mbetet pa përgjigje,” tha Zv/Ministri i Jashtëm rus, Alexander Grushko.

Ndryshe, dje Ministria e Jashtme e Shqipërisë ka sqaruar rrethanat dhe arsyet se pse diplomati rus Aleksei Krivosheev është shpallur person non grata dhe duhet të largohet nga vendi brenda 72 orëve

“Për fat të keq, në kundërshtim me premtimet, diplomati ka vazhduar të shkelë masat ndaj Covid-19. Me keqardhje, qeveria shqiptare vendosi të deklarojë diplomatin Aleksei Krivosheev person non grata, me detyrimin për të lënë vendin brenda 72 orëve nga njoftimi zyrtar.”