Dëm shtetit 1.2 mln euro, arrest me burg për Arlind Gjokutaj, Fatmir Hoxhën dhe Alban Rulin!

Gjykata e Tiranës ka vendosur arrest me burg për dy zyrtarët e Ministrisë së Financave, Arlind Gjokutajn dhe Fatmir Hoxhën, dhe përmbaruesin Alban Rulin, të cilët akuzohen se kanë shpërdoruar detyrën dhe i kanë shkaktuar shtetit një dëm prej 1.2 milionë euro.

Sekretari i përgjithshëm i Ministrisë së Financave, Arlind Gjokutaj, nuk u paraqit në seancë, pasi sipas avokatëve kishte shfaqur probleme kardiake në izolim, dhe më pas është transportuar në spital.

Seanca përfundoi rreth orës 13:00, ndërsa ndaj Gjokutajt iu dha masa pa prezencë por me prokurë të posaçme të tij dhe u përfaqësua nga avokatët.

Në seancë kanë qenë të pranishëm vetëm Drejtori i Shërbimeve mbështetëse dhe çështjeve ligjore në Ministrinë e Financave, Fatmir Hoxha dhe përmbaruesi Alban Ruli.

Sipas prokurorisë, këta shtetas kanë vepruar duke pranuar shpërblimin e shtetasit Ilir Thana, në vlerën e rreth 82.000.000 lekëve, nga të cilat 50.000.000 lekë të kaluara në llogarinë e këtij shtetasi duke e trajtuar si pronar pa qenë në këtë status si dhe duke ekzekutuar për herë të dytë një vendim gjyqësor të ekzekutuar nga Ministria e Financave në vitin 2015.