Detaje nga vrasja e biznesmenit në Vlorë, shoqërohej nga një polic i Antidrogës!

Pas vrasjes mafioze të biznesmenit 40-vjeçar, Bledar Birçaj, mesditën e djeshme në Vlorë sot kanë dalë detaje tjera përveç se bëhej fjalë për vrasës profesionistë që kanë goditur direkt te pjesa e shoferit ku ishte objektivi i tyre.

Mësohet se viktima shoqërohej në mjet nga një efektiv policie i Antidrogës, i cili është marrë në pyetje për disa orë me radhë për lidhjen e tij me biznesmenin Birçaj, por edhe për atentatin. Ai ka qenë me armë në makinë dhe do ta përdorte, , raporton BW, por është stepur dhe ka shkuar menjëherë të fshihet për të shpëtuar.

 Gjithashtu mësohet se në momentin kur ndodhi ngjarja, 40-vjeçari Birçaj ishte në timon të mjetit BMW x5 me targe AA797CS, dhe kishte në brez një pistoletë bereta e mbushur me krehër. Vrasja u krye me kallashnikov modej 56, ndërkohë që në vendin e ngjarjes policia sekuestroi 29 gëzhoja.

Ndryshe, pas atentatit në Vlorë, ku mbeti i vrarë biznesmeni Bledar Birçaj, pasi u qëllua me breshëri teksa lëvizte me makinën e tij në lagjen “Hajro Çakërri”, policia ka shoqëruar deri më tani rreth 20 të dyshuar, të cilët mund të kenë informacione apo lidhje me ngjarjen kriminale.