Dialogu Kosovë- Serbi, Ali Ahmeti: Njohja e ndërsjellë garanton paqen

Zhvillimet politike në vend dhe rajon duke u përqëndruar kryesisht mbi ndryshimet kushtetuese dhe integrimin europian, përfshirë këtu edhe zgjedhjet në vend, si dhe dialogun midis Kosovës dhe Serbisë, ishin çështje që u dikutuan në takim të Kryetarit të Bashkimit Demokratik për Integrim, Ali Ahmeti, me të dërguarin special francez për Ballkanin Perendimor, Ambasadorin René Troccaz.

Duke foliur për dialogun midis Kosovës dhe Serbisë, Ali Ahmeti ka theksuar se njohja e ndërsjellë është zgjidhja e vetme që garanton paqen, sigurinë dhe stabilitetin në mbarë rajonin.

“Pa ndryshimet kushtetuese, rruga europiane është e bllokuar, kështu është theksuar në takim ndërkohë që pengesa e miratimit të amendamenteve kushtetuese është bllokim i qëllimshëm i integrimit europian. Qytetarët dhe vendi nuk kanë kohë për kalkulime për përfitime partiake në kurriz të së ardhmes së tyre europiane,” thuhet në njoftimin e BDI-së.

Ndryshe, Ambasadori René Troccaz ishte i shoqëruar nga Ambasadori Cyrille Baumgartner, Ish-Ambasadori Bernard Valero, si dhe Mathie Abgrall, nga Misioni i Europës Ballkanike në kuadër të Ministrisë së Europës dhe Punëve të Jashtme të Francës.