Diaspora pritet t’i bashkohet revoltës rinore, Berisha: Të shtunën, Protestë Kombëtare në mbështetje të studentëve
Duke bërë të ditur sot se Partia Demokratike thërret Protestë Kombëtare të shtunën në mbështetje të studentëve dhe gjimnazistëve, Kryetari i PD, Sali Berisha tha se diaspora pritet t’i bashkohet revoltës rinore ndërsa i bëri thirrje qytetarëve që t’i bashkohen kësaj proteste
“Sot nga mbarë Evropa, mijëra dhe mijëra shqiptarë nga diaspora pritet t’iu bashkohen protestës, revoltës së gjimnazistëve dhe studentëve të Tiranës.
Jam këtu për të bërë thirrje të gjithë qytetarëve të kryeqytetit që të bashkohen me këtë protestë, me këtë revoltë të një rëndësie të jashtëzakonshme për të ardhmen e këtij vendi.
Gjimnazistët dhe studentët po protestojnë në një revoltë të paparë, me një trimëri të jashtëzakonshme.
Tirana dhe Shqipëria nuk ka parë vajza dhe djem trima si ata, të cilët siç keni parë të gjithë, përballen dhëmb për dhëmb pa iu shkrepur syri me narkobanditë me uniformë, me narkobanditë të droguar, me kriminelë vrasës me pagesë dhe kanë fituar një simpati të madhe në mbarë shqiptarët.
Por kanë fituar një simpati të madhe në mbarë botën,” tha Sali Berisha duke theksuar se kauza e studentëve është bërë ndërkombëtare, falënderoj të gjithë kongresmenët dhe politikanët e huaj që kanë reaguar:
“Kjo lëvizje në një kohë relativisht të shkurtër ka gjetur lobime shumë të rëndësishme në tempullin e demokracisë amerikane.
Si rrallë ndonjëherë, kongresmenë dhe senatorë në Kongresin e SHBA, ndonëse në kulmin e fushatës elektorale, kongresmenë të dy forcave më madhore politike në SHBA, republikanë dhe demokratë, kanë bërë një seri deklaratash në mbështetje të plotë të studentëve dhe kërkesave të tyre.
Mbështetje të plotë të studentëve dhe kërkesave të tyre kanë bërë parlamentarë të shquar të Parlamentit Evropian dhe Bundestagut.
Mbështetje të fuqishme kanë dhënë organizatat politike të qendrës së djathtë dhe të djathtë më të mëdhatë në botë, IDU, CDI dhe Partia Popullore.
Nuk ka pasur kurrë një lëvizje që me kaq shpejtësi të fitojë një mbështetje të tillë.
PD deklaroi në krye të radhës se ajo do bëjë gjithçka për mbështetjen e studentëve.
Do bëjë gjithçka për mbrojtjen e tyre.
Dhe unë jam këtu për të falënderuar me shumë mirënjohje kongresmenin Joe Wilson, kryetar i Komisionit të Helsinkit në Kongresin e SHBA.
Kongresmenin Robert Aderholt, mik i shquar i Shqipërisë, anëtar i grupit për Shqipërinë në Kongresin e SHBA.
Kongresmenin Keith Self, një deklaratë shumë e rëndësishme, i Partisë Republikane.
Deklarata e Bashkimit Demokrat Ndërkombëtar.
Deklarata e Komisionit Evropian.
Deklarata e Delegacionit të Parlamentit Evropian për Shqipërinë.
Deklarata e OSBE/ODIHR, organizatë ndërqeveritare.
Senatori Chris Murphy, demokrat.
Eurodeputeti Thomas Waltz, austriak.
Eurodeputeti Michael Gahler.
Deputeti i Bundestagut, Knut Abraham.
Senatorja Elissa Slotkin.
Kongresmeni Mike Lawer, republikan i Nju Jorkut.
Kongresmeni Jim McGovern.
Pra, siç e shihni, një numër shumë i madh kongresmenësh apo të themi kauza e studentëve është bërë një kauzë ndërkombëtare.
Dhe garantoj se përpjekjet tona janë të pandërprera, të vazhdueshme,” tha Kryetari i PD duke dënuar terrorin që po ushtrohet ndaj protestuesve, dhuna nuk do mund ta shpëtojë dot Vuçiçin shqiptar
“Dënoj me forcën më të madhe terrorin, dhunën antikushtetuese që komisariatet në shkelje të gjitha ligjeve po ushtrojnë ndaj qytetarëve në qytete dhe kudo për pjesëmarrjen e tyre në protesta paqësore.
Pa asnjë shkak, pa asnjë motiv, duke shkelur kode dhe Kushtetutë, marrin deklarata dhe besojnë si të verbër se me instrumentet e frikës do mund të shpëtojnë Vuçiçin shqiptar.
Edi Rama, argati i Vuçiçit, apo siç e kanë quajtur, Pashii shqipfolës, do të ketë fatin e tij ose të Çausheskut.
Duhet të zgjedhë vetë. Protestat nuk ndalen,” tha Kryetari i Partisë Demokratike, Sali Berisha, duke përfunduar:
“Partia Demokratike thërret protestë kombëtare në mbështetje të studentëve. Asgjë nuk e ndan më Partinë Demokratike nga këto dy parime: mbështetje e fuqishme, mbrojtje e tyre. Ky është përcaktimi ynë.”
