Diskutohet me Gjermaninë, Kurti: Aplikimi i Kosovës në Partneritet për Paqe!

Duke shprehur mirënjohje për kontributin e çmuar që ka dhënë Republika Federale e Gjermanisë për çlirimin, pavarësimin dhe shtetndërtimin e Kosovës si dhe rolin dhe rëndësinë që ka KFOR-i në Kosovë, Kryeministri i Kosovës, Albin Kurti, në takim me Sekretaren e Shtetit dhe Zëvendësministre e Mbrojtjes së Gjermanisë, Siemtje Möller, diskutuan për mbështetjen lidhur me qëllimin e Kosovës për përgatitje për aplikim dhe pranim në Programin e Partneritetit për Paqe të NATO-s,  si dhe në organizata tjera ndërkombëtare.

Në takimin i cili u zhvillua sot, Kryeministri Kurti foli për rëndësinë që Qeveria e Kosovës i kushton Procesit të Berlinit, si mundësia më e mirë për bashkëpunim mes vendeve të rajonit të Ballkanit Perëndimor për integrim në Bashkimin Evropian.

Ndërkohë, Sekretarja e Shtetit Möller duke vlerësuar marrëdhëniet e mira ndërmjet Kosovës dhe Gjermanisë tha se vizitat e shpeshta të nivelit shtetëror përveç se rikonfirmojnë marrëdhëniet e shkëlqyeshme shërbejnë edhe për thellimin e mëtejmë të miqësisë dhe bashkëpunimit.