Dje firmosi Marrëveshjen me PD, sot Bamir Topi jep dorëheqjen. Askush në FRD nuk e di!
Një ditë pasi “Fryma e re Demokratike” firmosi Marrëveshjen e koalicionit “Partia Demokratike – Aleanca për ndryshim”, kryetari i FRD, Bamir Topi dha dorëheqjen e parevokueshme.
Në letrën që Bamir Topi thotë se i ka dorëzuar në strukturat e Partisë nuk bëhen të ditura arsyet e vendimit të tij, ndërkohë ai që udhëhoqi negociatat me PD, Sali Shehi, aktin e dorëheqjes e kishte marrë vesh nga mediat.
“Të them të drejtën unë tani jam njohur me dorëheqjen dhe nuk kam informacionin e duhur për tu dhënë arsye, por besoj zoti Topi do ti sqarojë vetë,” tha për media Shehi ndërsa kundërshtoi arsyen e dorëheqjes për shkak të mosmarrëveshjeve në lidhje me koalicionin me PD-në.
“Nuk besoj të jetë për këty arsye, por në këtë moment do të mbledhim kryesinë dhe të falenderojmë zotin Topi për kontributin e tij në parti. Marrëveshja është firmosur në dakordësi me të gjithë kryesinë,” tha Sali Shehi e për të vërtetuar se çfarë partie rrumpallë ka Bamir Topi që nuk i duhet as dreqit, nuk e konfirmoi dot nëse Topi do të jetë kandidati i FRD-së në listën e koalicionit “Partia Demokratike – Aleanca për ndryshim”, duke deklaruar se kjo do të rishihet kur të vijë momenti për hartimin e këtyre listave.
Ndryshe, në zgjedhjet e fundit Bamir Topi ishte në Aleancë me Partinë Socialiste dhe ende nuk është e qartë nëse kjo lëvizje e tij levantine ka të bëjë me ruajtjen e marrëdhënieve me liderin e tij historik, Edi Rama.
