DPA ul tarifat e dokumenteve dhe fotove

Drejtoria e Përgjithshme e Arkivave, DPA, i mundëson tashmë çdo studiuesi, të interesuari dhe qytetari, përftimin e riprodhimit të printuar një dokumenti arkivor, për një tarifë prej vetëm 20 lekësh.

Gjithashtu, në sajë të Urdhrit “Për miratimin e tarifave të njehsuara të shërbimit të dokumentacionit në Rrjetin Arkivor Kombëtar në Republikën e Shqipërisë”, studiuesit do mund të marrin në zotërim riprodhimin e skanuar të dokumenteve për një shumë prej vetëm 10 lekësh nga tarifa e dikurshme prej 20 lekësh.

Kësisoj, hulumtuesit mund të bëjnë tyret foto të personaliteteve, vendeve apo të aktiviteteve të ndryshme, të paraqitura në faqen online të Fototekës së Arkivit Qendror Shtetëror, AQSH, me çmim të përgjysmuar. Thënë këtë, fotot me rezolucion deri në 600 dpi dhe që mbajnë logon e institucionit, do të kushtojnë vetëm 500 lekë, prej çmimit të mëparshëm të 1.000 lekëve. Ndërsa fotot me rezolucion deri në 1200 dpi pa logo dhe me të drejtë publikimi, do të kushtojnë 5.000 prej shumës së dikurshme të 10.000 lekëve.

Reduktimi i tarifave do të mbulojë edhe rastet që parashikojnë: dhënien e matarialit arkivor filmik për vepra derivate, për përdorim familjar, studimor, muzeor, si edhe për aktivitete kulturore.

Ky hap ndërmerret në kuadër të situatës së vështirë ekonomike të vendit dhe është në vazhdën e përpjekjeve të DPA-së për t’iu ardhur në ndihmë studiuesve. Këto masa i bashkëngjiten synimit të përmirësimit të kushteve të ruajtjes së pasurisë dokumentare.

Aplikimi i tarifës së përgjysmuar, thekson Drejtoria e Përgjithshme e Arkivave, vjen në funksion të ikurajimit të hulumtimeve. Në mënyrë të veçantë, ulja e kostos së dokumentit dhe fotos së riprodhuar do të ketë një ndikim të favorshëm për studentët, të cilët kanë nevojë për burime të shumta dokumentare gjatë kryerjes së punimeve të tyre akademike.