“Drafti Rama”, zyra e Kryeministrit Kurti: Nga Shqipëria zyrtare presim mbështetje!
“Nga Shqipëria zyrtare presim mbështetje, ndërmjetësues kemi shumë,” është ky reagimi nga zyra e Kryeministrit Albin Kurti për Drafin e Statutit të Asociacionit të komunave me shumicë serbe në Kosovë i propozuar nga Kryeministri Edi Rama
Në reagimin për TCH, zyra e Kryeministrit Albin Kurti sqaron se çështja e marrëveshjeve të mëhershme për Asociacionin e komunave me shumicë serbe, është çështje e funksionalitetit të shtetit të Kosovës,
“Çështja e kryetarëve të katër komunave në veri të vendit është çështje e respektimit të kushtetutës, sundimit të ligjit dhe ofrimit të shërbimeve ndaj qytetarëve tanë, që për shkak të bojkotit të diktuar nga Serbia u kishin munguar për plot 6 muaj.
Çështja e marrëveshjeve të mëhershme për Asociacionin e komunave me shumicë serbe është çështje e funksionalitetit të shtetit të Kosovës, dhe kjo u dëshmua me draftin e prezantuar nga Ekipi Menaxhues që drejtohej nga deputetja e Vuçiçit që synonte një Republika Srpska në Kosovë dhe së fundmi me Non-paperin e Akademisë së Shkencave dhe e Artit e Serbisë që flet për “Botën Serbe,” thuhet në reagimine Zyrës së Kryeministrit Albin Kurti duke përfunduar:
“Në të dy rastet në pyetje është Kosova. Në të dy rastet rreziku është Serbia. Ata që janë të lirë në qëndrime dhe pa ndonjë ngarkesë, e kuptojnë këtë. Nga Shqipëria zyrtare presim mbështetje. Ndërmjetësues kemi shumë.”
Ndryshe Kryeministri i Shqipërisë, Edi Rama, duke bërë të ditur se ka hartuar një Draft të Statutit për Asociacionin e komunave me shumicë serbe në Kosovë, tha se ja ka dërguar Presidentit të Francës, Emmanuel Macron, Kancelarit të Gjermanisë, Olaf Scholz, dhe Këshillit Evropian.
Duke e pranuar se nuk është konsultuar fare me Kryeministrin e Kosovës, Albin Kurti, dhe as nuk ishte porositur nga dikush për ta hartuar, Kryeministri Edi Rama nuk bindi njeri duke thënë se është i shqetësuar për Kosovën ndërsa shtoi se ky Draft i Statutit është një dokument i nivelit më të lartë ndërkombëtar që merr në konsideratë të gjitha arsyet për krijimin e Asociacionit të komunave me shumicë serbe dhe që Asociacioni është pjesë e organizimit të jetës për Kosovën!
