E shtuna e zezë e Flutura Açkës…

E shtuna e 5 Majit ishte tragjike për shkrimtaren e madhe shqiptare, Flutura Açka. Ajo përmes rrjetit social Facebook bëri të ditur ndarjen nga jeta të të birit 18 vjeçar, Jerin van den Brink.

Pena e fortë e Fluturës nuk mungon edhe në një ditë të tillë pikëllimi kur ndahet nga i biri i cili vuante nga një sëmundje shumë e rrallë:

“Nuk është e lehtë për një nënë ta lyejë bojën me të zezë për të tillë lajm, as ta pranoj humbjen e qenies më të dashur që pata, dhe kam, mbi këtë dhé. Me drojën se nuk do të mësohem kurrë me mungesën e tij, uroj të dëgjoj vetëm lajme të mira prej jush.”

Stafi i Pafrike.al i shprehë ngushllime Flutura Açkës për këtë humbje të madhe!

Ja dhe postimi i plotë

Miqtë e mi,

Mbrëmë, në një orë të vonë të natës, u nda nga jeta Biri im i vetëm, Jerin van den Brink, në të tetëmbëdhjetat e tij, prej një sëmundjeje shumë të rrallë, nga e cila vuajti kohët e fundit. Nuk është e lehtë për një nënë ta lyejë bojën me të zezë për të tillë lajm, as ta pranoj humbjen e qenies më të dashur që pata, dhe kam, mbi këtë dhé. Me drojën se nuk do të mësohem kurrë me mungesën e tij, uroj të dëgjoj vetëm lajme të mira prej jush. Sipas dëshirës së Jerinit, ceremonia e lamtumirës do të mbahet me një rreth të ngushtë familjar e shoqëror në Utrecht të Holandës, ku im Bir jetonte prej disa vitesh, pas një fëmijërie të gjatë në Shqipëri. Për miqtë e mi në Shqipëri, do të jem në Atdhe përgjatë muajit qershor.

Flutura