E vërteta, SHBA: Irani nuk e kontrollon Ngushticën e Hormuzit!

Komanda Qendrore e ushtrisë së Shteteve të Bashkuara, CENTCOM, përsëriti qëndrimin amerikan se Ngushtica e Hormuzit është një rrugë ujore ndërkombëtare të cilën Irani nuk ka të drejtë që ta kontrollojë.

Komanda publikoi mbrëmjen e së enjtes një verifikim faktesh lidhur me pretendimet iraniane mbi këtë rrugë kyç ujore.

“PRETENDIM: Media shtetërore iraniane pretendon se kalimi nëpër Ngushticën e Hormuzit lejohet vetëm përmes rrugëve të përcaktuara nga Irani,” u shpreh CENTCOM përmes rrjetit social X.

“E VËRTETA: Irani nuk e kontrollon Ngushticën e Hormuzit. Që nga fillimi i majit, forcat amerikane kanë ndihmuar në lehtësimin e kalimit të suksesshëm të mbi 800 anijeve tregtare dhe 380 milionë fuçive me naftë të papërpunuar përmes korridorit vital ndërkombëtar të tregtisë,” shprehet Komanda Qendrore e ushtrisë së Shteteve të Bashkuara, CENTCOM.

Teherani zyrtar është shprehur se do të vendosë tarifa për anijet që kalojnë përmes ngushticës, një sugjerim që është kundërshtuar nga shumica e vendeve të botës.

Rreth 20 për qind e furnizimeve botërore me naftë të papërpunuar dhe gaz kalon përmes ngushticës, e cila është bërë pikë e tensioneve mes Shteteve të Bashkuara dhe Iranit.

Irani praktikisht e kishte mbyllur krejtësisht Ngushticën e Hormuzit pas nisjes së sulmeve të Shteteve të Bashkuara dhe Izraelit ndaj Republikës Islamike më 28 shkurt./RFE/