Edhe pse krijoi Komitetin Kombëtar, Edi Rama: Nga vlerësimi që bëmë me Oltën, Gentin dhe Endrin…

Kryeministri Edi Rama duke iu rikthyer mbledhjeve të jashtëzakonshme të orës 07:00 të mëngjesit pas situatës së krijuar me tërmetin e 26 Nëntorit, ka bërë një bilanc duke theksuar se në strukturën e emergjencës janë 12.366 persona dhe ndonëse krijoi me një pompozitet mediatik Komitetin Kombëtar për Rindërtim ai sot në këtë mbledhje tha se një vlerësim të thjesht e kishte bërë bashkë me Oltën, Gentin dhe Endrin.

Duke garantuar se do të kositen të gjitha dosjet për të çuar para përgjegjësisë gjithë ata që kanë abuzuar dhe ata që qëndrojnë pas godinave të shembura, Edi Rama kishte kohë edhe për gallatë ndërsa paralajmëroi se KÇK nuk do të ketë asnjë mundësi që edhe në këtë situatë të kapë ça të kapë.

“Ajo që është e rëndësishme është se të gjithë janë të garantuar sa i përket ushqimit dhe veshjeve. Ka të tjerë që ende nuk janë sistemuar. Ndaj do ju lutesha të treja shtabeve që të bëjnë maksimumin që të përfundojë kjo përfshirje për infrastrukturën e akomodimit të përkohshëm.

Objektet arsimore me dëme të rënda janë 31. Institucione shëndetësore me dëme të konsiderueshme që vazhdojnë punën janë 21 dhe tani që flasim inspektimi i objekteve ka arritur shifra domethënëse, 4.151 objekte të inspektuar në Durrës, ku 1.725 janë të pabanueshme,” tha Edi Rama ndërsa kishte porosi për të ngarkuarit me punë lidhur me shembjen e objekteve që përbëjnë rrezik.

“Do ju kërkoja këmbëngulësisht Zv.kryeministrit që të mos vonohemi, të prishim objektet e dëmtuara. Të bëhet inventari i tyre. Këtu u hap një parantezë për keqkuptim lidhur me punën paralele që po zhvillohet për hetimet dhe nxjerrjen  e përgjegjësive dhe vendosjen e para përgjegjësive të të gjithë atyre që do të rezultojnë përgjegjës pavarësisht fuqisë së tërmetit.”

Pas pak sekondave që u përmbajt sërish sulmoi mediat dhe vazhdojë përrallat me KÇK edhe në këto ditë të vështira që po kalon kombi:

“Policia e Shtetit në bashkëpunim me Prokurorinë po vazhdon intensivisht se do të ketë rezultate në ditët në vijim. Po ju them atyre që më shkruajnë që bien pre e atyre lehaqenieve mediatike, këto raste do shkojnë në gjykatë dhe KÇK është e gatshme që të shfrytëzojë këtë moment. Ne nuk do t’i japim KÇK mundësinë që të shqyejë dhe të kapë ça të kapë. Do bëjmë çmos që këto raste do jenë të kopsitura.”

Që nuk është serioz nuk e ka vënë kush në dyshim por njeriu që themelon një Komitet Kombëtar për Rindërtim sot në mbledhjen e Qeverisë tregon se vlerësimin e bënë me Oltën, Gentin dhe Endrin:

“Nga një vlerësim i thjesht që bëmë bashkë me Oltën, Gentin dhe Endrin, ata që kanë nevojë për një çadër dimërore janë të mbuluara, pasi po bëhen transportet. Pastrimi në Durrës ka filluar. Në Durrës janë shembur 27 objekte. KE ka dhënë 15 mln euro. Për të gjithë spektatorët, KE po punon intensivisht për ne për dy mekanizma të tjerë, për të rialokuar të gjithë fondet HIPA,” tha Kryeministri duke dhënë detaje lidhur me planin e rindërtimit në zonat e shkatërruara nga tërmeti.

“Në Durrës do të bëjmë një lagje të re, do të jemi shumë të kujdesshëm në pikat ku janë krijuar hapësira për shkak të shembjeve, po të jenë hapësira që të shihen si potencial për zhvillimin e qytetit edhe me parqet e kujtesës për cfarë ndodhi, dhe me infrastrukturën sociale për cfarë ndodhi.”

Në Tiranë, tha Edi Rama, tashmë është e qartë se duhet një ndërhyrje e fortë në Kombinat.

“Prishje e gjithë godinave problematike dhe ndërtimi i një blloku të ri banesash për të akomoduar gjithë ata njerëz që do të humbasin shtëpinë aty me parametra krejt të tjera. Një pikë të 5 maji, pranë lumit është një zonë ku ne mund të bëjmë spostime se pjesët më të prekura brenda qytetit janë kombinati dhe zona e njësisë 4, por mund të bëjmë spostime pa iu spostuar jetën në të njëjtën hapësirë gjeografike. Dhe një tjetër në ish Uzina e Autrotraktorëve, më e vogël, por e nevojshme,” tha Kryeministri duke shtuar se këto janë tre pikat që plotësojnë nevojat dhe krijojnë hapësirën për programin e rindërtimit me objektiv afatmesëm 10 mijë apartamente dhe afatshkurtër, 12-18 muaj, 5 mijë apartamente, pa llogaritur infrastrukturën.