Edi Rama mashtroi me studimin e tij, Berisha: Opozita është nën tiraninë mediatike!

Mediat që sulmojnë më shumë opozitën vlerësohen nga Edi Rama si mediat më pro-opozitare, tha sot Kryetari i Partisë Demokratike, Sali Berisha, duke denoncuar mashtrimin e Ramës me studimin e tij ndërsa konstatoi se Opozita është nën tiraninë mediatike të mediave të kapura.

“Sot, jam para jush për të faktuar me studime të porositura nga Edi Rama, tiraninë mediatike ndaj opozitës shqiptare në Shqipëri.
Edi Rama para pak kohësh me paturpësi ekstreme, dhe theksoj se kur nuk ke turp, bën çdo gjë dhe thua çdo gjë, u paraqit para shqiptarëve dhe opinionit ndërkombëtar si qeveri e një vendi në të cilin mediet ishin të kapura nga opozita.
Në shkallë ekstreme paturpësie ai u referua një studimi që provon absolutisht të kundërtën në raport me opozitën, provon tiraninë e medieve të kontrolluara nga Rama ndaj opozitës, sipas të cilit mediat në 67 përqind të tyre qenkan për opozitën dhe vetëm në 30 e sa përqind për qeverinë.
Një deklaratë të tillë mund ta bëjë një njeri që ka humbur kontrollin psikik, por jo nga sëmundja, nga transformimi i tij i tmerrshëm psikologjik.

Studimi në fjalë, që i referohet Edi Rama, nuk ka asnjë lidhje absolute me studimin e kapjes së medieve.
Jo dhe jo.
Kapja e medieve ka treguesit e vet dhe nuk ka media më të kapura në Evropë se mediat private në Shqipëri, nuk po flas për shtetëroren po e po, të cilat marrin titullin e investitorit strategjik, të cilat marrin dhurata 4500 katrorë tokë në mes të Tiranës, e lënë për gjimnaz.
Nuk ka media më të kapura në botë, të cilat ushqehen me leje të paligjshme ndërtimi.
Të cilat, siç është faktuar, marrin miliona e miliona euro nga tenderat e rrugëve dhe punëve publike me qëllimin e vetëm të mbrojnë qeverinë dhe të sulmojnë opozitën.
Nuk ka një zyrë tjetër të faktuar, e cila drejton jo vetëm lajmin, por drejton edhe editorialet.
Raportet e pavarura dhe të vërteta që kanë studiuar kapjen e medieve, kanë treguar se ato në 90-93 përqind të tyre në lajme dhe editoriale kontrollohen nga qeveria dhe janë për qeverinë,” tha Sali Berisha duke denoncuar edhe vlerësimin e Edi Ramës për mediat pro-opozitare.

“Por tani, le të ndalemi pak tek studimi i Diellës që i referohet Edi Rama. Kemi të bëjmë me një metodë, e cilat quhet metoda e studimit të zërit, të përmendjeve, pra sa herë përmendet kjo apo ajo parti, personalitet apo çfarëdo qoftë tjetër në raport me tjetrin.
Pra, nuk ka asnjë lidhje me kapjen. Ka thjesht përmendjen, pra kush përmendet. Pra sa përmendesh në lajme, në editoriale.
Këtu, mesatarja e PD është 63 për qind.
Kampion është Balkanwebi pas birësimit të Ervin Salianjit, se Salianjin e kanë futur dhe ia quajnë PD-së. Vjen A2CNN, edhe ky po me ato qëndrimet e veta. E treta pro PD-së është famozja JAVA, portali më ekstremist shqiptar. Shikoni se kush është.
Pastaj vjen Ymer Çorapja, aleati i madh, i cili ka në çdo numër të portalit minimumi 2 apo 3 artikuj për Sali Berishën.
Shikoni se çfarë mashtruesi ordiner, t’i thuash çdo gjë, por nuk po prish gojën time. Pra vjen gazeta e Ymer Çorapes, pro PD-së. E kapur nga PD sipas Edi Ramës. Pastaj vjen Albeu. Pastaj vjen TV Klan me 63 për qind. Top Channel me 62 për qind.
Shqiptarja me 62 për qind. Vizioni me 60 për qind. Telegraf me 60 për qind. Gazeta Shqip me 59 për qind. Pastaj vjen Newsbomb me plot mëshirë 54 për qind.
Pra, mediat që sulmojnë më shumë opozitën nga mëngjesi gjer në darkë, mediat që unë i kam denoncuar para jush shumë kohë përpara, janë pjesë e asaj tiranie mediatike kundër opozitës.
Janë pjesë e sistemit të persekutimit politik ndaj opozitës.
Pjesë e shpifjeve dhe trillimeve monstruoze ndaj saj, vlerësohen nga Edi Rama si media pro-opozitare me në krye Ymer Bazen, Karlo Bolinon,” tha lideri i opozitës duke konstatuar se çdo përmendje në media, Rama e llogarit si mbështetje për opozitën.

“E kuptoni ju tani se çfarë skandalozi është ky njeri, i cili përqindjen e përmendjes në media e paraqet si dëshmi të kapjes së medieve nga opozita.
Por kjo i bën nder opozitës se kjo dëshmon se opozita e vërtetë ka qëndruar në mënyrën më të fuqishme.
Ka qëndruar e pamposhtur.
Kjo dëshmon se reagimet e saj ndaj të gjitha akteve kriminale, korrupsionit, shpifjeve, trillimeve, kanë qenë të fuqishme dhe opozita ka qëndruar e pamposhtur,” tha Berisha duke vlerësuar se Edi Rama e nxjerr veten më mirë se Franca dhe Gjermania.

“Nuk jam thotë Lukashenko, këto janë në Bjellorusi me media shtetërore.
Nuk jam Putini, nuk jam Orbani, as Erdogani, as Vuçiçi, por del edhe më mirë se sa Merz dhe Macron apo Franca dhe Gjermania, studimet e të cilave janë me metodologji krejtësisht të tjera.
Po për të nuk ka rëndësi, rëndësi ka që të paraqesë grafiqe mashtrimi. I turpshëm,” tha Kryetari i Partisë Demokratike, Sali Berisha, ndërsa denoncoi Edi Ramën i cili kontrollon mbi 90 për qind të mediave duke e vlerësar studimin e i tij si keqpërdorim të urtësisë artificiale ndërsa përfundon:

“Ky është rasti më klasik i shpërdorimit të urtësisë artificiale, e cila në vetvete nuk ka asnjë gabim në atë që thotë, por në fakt rezultatet e saj nuk kanë asnjë lidhje me kapjen apo jo të medieve.
Janë metodologji krejtësisht të tjera ato që përdoren për kapjen e medieve dhe që kanë provuar se në Shqipëri kontrollon 90 për qind, 92 për qind të medieve.
Shikoni se si Edi Rama duke paraqitur pro-opozitar Ymer Çorapen, Karlo Bolinon, etj, etj kërkon të mashtrojë shqiptarët dhe botën. Nuk ka turp, por ai nuk di se ç’bën.”