Edi Rama, monopol kriminal mbi shëndetin e shqiptarëve

nga Bardh Spahia*

Denoncimet e vazhdueshme të partisë demokratike për aferat korruptive dhe kriminale të Edi Ramës u faktuan me dëshminë tronditëse nga ish-zëvendëskryeministrit Arben Ahmetaj, gjatë një intervistë televizive.

Këto deklarata faktojnë se Shqipëria nuk qeveriset më nga institucionet, por nga një organizatë kriminale e ngritur nga Edi Rama, e cila ka kapur çdo qelizë të shtetit dhe e ka kthyer buxhetin e shqiptarëve në prenë e saj.

Shteti i është dorëzuar plotësisht këtij grupi të mirëfilltë kriminal me në krye Edi Ramën.

Por një pjesë alarmante e dëshmisë lidhet me planin e ri kriminal që po përgatitet për shëndetësinë, për jetën dhe sigurinë e çdo qytetari shqiptar.

Sipas Ahmetajt, Evis Sala nuk u largua për meritat e saj në fushën e shkencës, siç përpiqet ta shesë propaganda qeveritare. Largimi i saj heq çdo pengesë dhe i hap dritën jeshile shtrirjes në shëndetësi të modelit kriminal KAYO, nëpërmjet mikut tjetër të Ramës San Sanilevic.

Nuk kemi thjesht një ndryshim emrash në kabinet. Kemi largimin e një ministreje që nuk mbushi asnjë vit në detyrë, në mënyrë që vendin e saj ta zërë dikush i gatshëm të firmosë gjithçka.

Edi Rama nuk po riorganizon qeverinë për të përmirësuar shërbimin ndaj qytetarëve, për të siguruar ilaçet e munguara te Onkologjiku apo pajisje më të mira diagnostikuese dhe shpëtuese. Ai po pastron rrugën institucionale për planin e radhës të organizatës së tij kriminale: krijimin e një strukture të vetme që të marrë nën kontroll prokurimet, furnizimet, barnat, pajisjet dhe shërbimet më fitimprurëse të shëndetësisë. Më pas, përmes ortakërive të paracaktuara, kontratat dhe paratë publike t’u kalojnë kompanive të përzgjedhura pa garë, pa transparencë dhe pa kontroll.

Kjo nuk është reformë shëndetësore. Është përpjekja për të ngritur një monopol kriminal mbi shëndetin e shqiptarëve. Është tentativa për ta kthyer sëmundjen në biznes, pacientin në burim fitimi dhe buxhetin e shëndetësisë në bankomatin personal të klientelës së pushtetit.

Pasi gllabëruan qindra milionë euro me katër koncesionet korruptive në shëndetësi; pasi abuzuan me tenderët e barnave të skaduara dhe jashtë standardeve; pasi i lanë spitalet pa medikamente dhe qytetarët të paguajnë nga xhepi edhe trajtimet bazë, tani duan t’i fusin në një dorë të vetme të gjitha prokurimet, furnizimet dhe shërbimet fitimprurëse. Jo për t’u shërbyer më mirë pacientëve, por për t’i kontrolluar më lehtë paratë e shëndetësisë, për t’i shpërndarë mes klientëve të tyre dhe për t’i vjedhur edhe më shumë.

Në këtë skemë, mjeku nuk ka zë, pacienti nuk ka të drejtë dhe interesi publik nuk ekziston. Vendos vetëm organizata kriminale. Ajo përgatit ligjin, zgjedh kompaninë, cakton fituesin, kontrollon fondet dhe merr fitimin. Ministrave dhe administratës u mbetet vetëm të firmosin dhe të marrin shpërblimin.

SPAK dhe organet e drejtësisë duhet të marrin përgjegjësitë që u takojnë. Të sekuestrojnë dokumentet, të verifikojnë kontratat, të ndjekin paratë dhe të marrin në pyetje çdo person të përmendur. Mbi bazën e provave, duhet të marrin të pandehur kreun dhe anëtarët e kësaj organizate kriminale të drejtuar nga kryeministri Rama. Përballë denoncimeve, dokumenteve dhe përgjimeve të tilla, heshtja nuk është më neglizhencë. Heshtja është mbrojtje politike dhe bashkëfajësi morale.

Kjo qeveri nuk ka më as legjitimitetin politik dhe as autoritetin moral për të drejtuar vendin. Ajo duhet të largohet menjëherë dhe t’i hapë rrugën krijimit të një qeverie, e cila të garantojë rikthimin e ligjshmërisë, çlirimin e institucioneve dhe zgjedhje të lira e të ndershme.

Ky pushtet nuk ka më as program e as besë për Shqipërinë. Ka vetëm një plan kriminal për plaçkitjen e saj. Prandaj qeveria duhet të largohet, drejtësia duhet të veprojë dhe përgjegjësit duhet të dalin përpara ligjit. Sepse sa më gjatë qëndron Edi Rama në krye, aq më pak Shqipëri u mbetet shqiptarëve.

*Deputet i PD