Eliminimi i vrasësit të Arkanit/ Është vrarë gabimisht, Ja kush ishte shënjestra…

Pasi u vra në Johanesburg, dhe ende nuk ishte e sigurt nëse bëhej fjalë për vrasësin e Arkanit, Milan Miki Gjuriçiç, meqë ishte i pajisur me pasaportë belge, Interpoli i dërgoi gjurmët e gishtave të personit të vrarë, Ministrisë së Punëve të Brendshme të Serbisë, kur dhe u konfirmua se bëhet fjalë për Gjuriçiçin.

Sipas mediave lokale në Johanesburg, ai është vrarë më 25 Prill rreth orës 13:25, në momentin kur kishte ndaluar me xhip në semafor. Një makinë e bardhë i kishte bllokuar rrugën,  dhe dy persona të maskuar kanë dalë nga makina dhe me pushkë automatike e kanë bërë shoshë trupin e Gjuriçiçit.

Mediat e Johanesburgut raportojnë se Gjuriçiçi, i cili në Serbi është i dënuar me 30 vjet burg, për vrasjen e kriminelit të luftës dhe shefit të nëntokës serbe në atë kohë, Zhelko Razhnatoviç Arkan, kishte një jetë luksi në Johanesburg, në Bocvan kishte një hotel ndërsa vitin e fundit u bë i afërt edhe me nëntokën e Republikës së Afrikës së Jugut, për çfarë dyshohet se është eliminuar për konflikte me territorin kriminal dhe punët e pista me tarfikun e drogës dhe njerëzve.

Por në qarqet e afërta me Gjuriçiçin, thekson e përditshmja serbe “Blic”, qarkullon informacioni se është eliminuar gabimisht, dhe se shënjestër ishte një “peshk më i madh”. Mendohet se shënjestër ishte Dobrosav Gavriç, gjithashtu i akuzuar për vrasjen e Arkanit, i cili ka gjetur strehim në Republikën e Afrikës së Jugut, e që ishte mik i ngushtë i Millanit.

Hetimet vazhdojnë dhe pritet të zbulohet shkaku dhe kush e vrau Gjuriçiçin në Johanesburg.