Elshani: Përfundon tërheqja 25% e policisë nga objektet komunale në veri të Kosovës

Nga veriu i Kosovës janë tërhequr 25 për qind e pjesëtarëve të Policisë së Kosovës. Kjo është konfirmuar sot nga Zv/Drejtori rajonal i Policisë së Kosovës në rajonin e Mitrovicës së Veriut, Veton Elshani.

“Pas pranimit të vendimit të qeverisë nga ana e menaxhmentit të Policisë, i njëjti është dërguar në teren për ekzekutim. Vendimi i Qeverisë së Kosovës ka filluar të implementohet dje dhe ka përfunduar sot,” tha Veton Elshani.

Ndryshe, në marrëveshjen e arritur të hënën në Bratislavë, parashikohet që në kuadër të hapave të shtensionimit të situatës në veri, Kosova të reduktojë për 25 për qind prezencën e Policisë së Kosovës në dhe rreth objekteve komunale në veri.