Epopeja e UÇK-së, Albin Kurti nga Prekazi: Me përkulje dhe admirim, i jemi mirënjohjes familjes Jashari!

Familja Jashari do të mbetet udhërrëfyes për të gjithë brezat, tha Presidentja Vjosa Osmani e cila së bashku me Kryetarin e Parlamentit, Glauk Konjufca dhe kryeministrin Albin Kurti, bënë sot homazhe në Kompleksin Memorial Adem Jashari në Prekaz.

“Kemi ardhur këtu të shprehim përkujtimin e përjetshëm për familjen Jashari. Epopeja është e krenarisë e cila ka kthyer dinjitetin e popullit dhe simbolizonë lirinë. Familja Jashari do të mbetet udhërrëfyes për të gjithë brezat,” tha Presidentja e Kosovës ndërsa Kryetari i Parlamentit shtoi:

“Jemi këtu ti bëjmë nderimet tona. Në gjithë historinë tonë sakrifica e Jasharëve dhe lufta e UÇK-së përbëjnë ndër ngjarjet më të rëndësishme. Për sa kohë të ketë popull shqipar do të jetë një vend ku jo vetëm përkulemi por edhe gjejmë frymëzim.”

Ndërsa Kryeministri i Kosovës, Albin Kurti, pas homazheve tha se secili duhet të vijmë në këtë vend që mos të harrojmë të kaluarën.

“Kthehemi  këtu që të përkujtojmë çmimin dhe rrënjët e lirisë. Secili duhet të vijmë në këtë vend që mos të harrojmë të kaluarën. Me përkulje dhe ndjenjë admirimi gjithmonë i jemi mirënjohjes familjes Jashari.”

Ndryshe, në kuadër të aktiviteteve shtetërore në shënim të 26-vjetorit të Epopesë së UÇK-së, krerët e shtetit të Kosovës kanë bërë homazhe në Kompleksin Memorial “Adem Jashari” ashtu si dhe shumë qytetarë të ardhur nga të gjitha viset shqiptare.