Lezhë, atentat pranë shkollës, qëllohet me armë zjarri 54-vjeçari

Qëllohet me armë zjarri një person në fshatin Rrile të Lezhës. Raportohet se 54-vjeçari Agron Puka ka mbetur i plagosur në rrethana ende të panjohura.

Mësohet se shënjestra e atentatit, Agron Puka, sapo kishte dërguar fëmijët e tij në shkollë me makinë, kur i është bërë pritë me breshëri automatiku.

Për pasojë ai ka marrë plagë në trup. E gjithë ngjarja ka ndodhur pranë dyerve të shkollës së Rriles ku janë traumatizuar edhe nxënësit e shumtë që ndodheshin në vendngjarje.

“Rreth orës 08:00, në fshatin Rrilë, shtetasi A. P., 54 vjeç, banues në fshatin Rrilë, duke lëvizur me automjet, është plagosur me armë zjarri nga 1 person ende i paidentifikuar. 54-vjeçari është transportuar në spitalin rajonal të Lezhës, ku është në kujdesin e mjekëve (aktualisht jashtë rrezikut për jetën),” thuhet në njoftimin e policisë ndërkohë BW raporton se në atentatin ndaj 54-vjeçarit Agron Puka në fshatin Rrilë të Lezhës kanë marrë pjesë tre autorë të cilët kanë zbritur nga një makinë Audi në ngjyrë të bardhë, duke qëlluar mbi 54-vjeçarin. Plumbat e kanë zënë Pukën në sup dhe në kraharor, por ai ndodhet jashtë rrezikut për jetën.

Policia aktualisht ndodhet në vendin e ngjarjes, afër gjimnazit të fshatit.

Me qëllim identifikimin e autorëve, policia po merr pamjet nga kamerat e sigurisë nga një lokal pranë shkollës 9-vjeçare ku dhe ndodhi ngjarja.