Eurobasket 2025/ Sonte Kosova-Zvicra, Dardanët synojnë fitore

Përfaqësuesja e Kosovës në basketboll, sonte përballet me Zvicrën, në kuadër të Raundit të Tretë Parakualifikues për Eurobasket 2025, sfidë kjo që fillon në orën 20:45.

Kosova dhe Zvicra, do të ballafaqohen në “Sezai Surroi” në Prizren, në njërën nga ndeshjet më të rëndësishme në vitet e fundit në basketboll.

Atmosfera në taborin e skuadrës kosovare, është mjaft e mirë dhe premtuese për fitore, anipse përball është një skuadër e fortë siç është Zvicra.

Kosova nën drejtimin e trajnerit Rami Hadar ka disa ditë që është duke u përgatitur për duelin me zviceranët.

Përzgjedhësi i Kosovës, Rami Hadar, është shprehur optimist para sfidës ndaj Zvicrës.

“Mund të them se jam i kënaqur me angazhimin e basketbollistëve në stërvitje dhe kushteve të ofruar nga Federata e Basketbollit e Kosovës. Kemi analizuar sa kemi mundur Zvicrën, ku njohim lojtarët dhe trajnerin. Do të japim më të mirën për rezultat pozitiv,” tha Hadar.

Kosova për herë të parë luan në Prizren dhe palestra e sporteve “Sezai Surroi” pritet të mbështetet nga tifozët “Dardanë” në rrugëtimin e ri për Eurobasket 2025.

Ndryshe, pas ndeshjes me Zvicrën, Kosova do të jetë mysafire e Danimarkës, më 26 korrik dhe 29 korrik e Zvicrës. Ndeshja e fundit do të jetë më 5 gusht ndaj Danimarkës. Vetëm vendi i parë kualifikohet tutje.