Eurostat: Shqipëria humb 4% të nxënësve të fillores në një vit, BE vetëm 0.2%

Në Shqipëri, numri i nxënësve në arsimin fillor vijoi të bjerë edhe në vitin 2024. Nga 146.962 nxënës të regjistruar në vitin 2023, numri zbriti në 141.089, ose 5.873 nxënës më pak brenda një viti. Kjo përfaqëson një rënie prej rreth 4 për qind, dukshëm më të fortë se ajo e regjistruar në Bashkimin Europian, sipas të dhënave të Eurostat.

Në vitin 2024, në arsimin fillor në BE ishin të regjistruar 23.2 milionë nxënës, vetëm 0.2 për qind më pak se një vit më parë, ose një rënie prej 35 153 nxënësish.

Në Shqipëri, rënia ka prekur kryesisht arsimin publik. Numri i nxënësve në institucionet publike ra nga 130.067 në vitin 2023 në 123.491 në vitin 2024, ose me 6.576 nxënës, një tkurrje prej rreth 5.1për qind.

Në të kundërt, arsimi privat ndoqi prirjen e kundërt. Numri i nxënësve në institucionet private u rrit nga 16 895 në 17 598, ose me 703 nxënës, që përfaqëson një rritje prej rreth 4.2 për qind.

Mësuesia, profesion i dominuar nga gratë

Në Shqipëri, 87.6 për qind e mësuesve të arsimit fillor janë gra, ndërsa vetëm 12.4 për qind janë burra, duke dëshmuar një dominim të theksuar të grave në këtë profesion.

Europa

Në një këndvështrim më afatgjatë, situata në Bashkimin Europian paraqitet ndryshe. Krahasuar me vitin 2014, numri i nxënësve në arsimin fillor u rrit me 2.9 për qind, ose me 659 086 nxënës.

Franca regjistroi numrin më të madh të nxënësve në arsimin fillor në vitin 2024, me 4.1 milionë, e ndjekur nga Gjermania me 3.3 milionë, Spanja me 2.8 milionë dhe Italia me 2.6 milionë.

Në të kundërt, shifrat më të ulëta u regjistruan në Maltë, me 27 537 nxënës, Luksemburg, me 43.020, dhe Qipro, me 60.596.

Numri i nxënësve në arsimin fillor lidhet me madhësinë e popullsisë, strukturën demografike, si edhe me dallimet mes vendeve sa i përket moshës së zakonshme të fillimit të arsimit fillor dhe moshës në të cilën fëmijët duhet të nisin arsimin formal të detyrueshëm.

Krahasuar me vitin 2014, numri i nxënësve në arsimin fillor u rrit në 15 vende të BE-së dhe u ul në 11 vendet e tjera për të cilat kishte të dhëna të disponueshme.

Rritjet më të mëdha relative u regjistruan në Luksemburg +21.4 për qind dhe Slloveni +18.2 për qind, ndërsa rëniet më të forta u shënuan në Poloni -25.7 për qind, Kroaci -10.3 për qind, dhe, Portugali -10.0 për qind./Monitor/