Evropa po ngrohet, vdekjet që lidhen me nxehtësinë po rriten! Jugu më i godituri
Vdekshmëria e lidhur me temperaturat e larta është rritur në 98.7 për qind të qyteteve evropiane që nga fillimi i shekullit, ku më të goditura janë qytetet e Evropës Jugore, ku numri i rasteve të vdekjeve janë rritur me 161 për qind, thekson studimi të ri i publikuar në revistën The Lancet.
Sipas Raportit të Qyteteve të Evropës 2026, në qytetet e Evropës Jugore midis viteve 2015 dhe 2024 janë shënuar mesatarisht 132 vdekje shtesë të lidhura me nxehtësinë për milion banorë. Kjo është një rritje prej 161 për qind krahasuar me periudhën 1991-2000.
Në qytetet e Evropës Perëndimore, numri i vdekjeve shtesë ishte 64 për milion banorë, krahasuar me mesataren evropiane prej 82.
“Qytetet kanë një rol kyç për të luajtur në përballjen me ndryshimet klimatike, duke zbatuar masat e përshtatjes dhe zbutjes së pasojave të tyre,” theksojnë shkencëtarët.
Evropa po ngrohet më shpejt se pjesa tjetër e botës
Në të njëjtën kohë, qytetet evropiane po i ndiejnë gjithnjë e më shumë efektet e ndryshimeve klimatike. Evropa po ngrohet më shpejt se pjesët e tjera të botës, me temperaturat e verës që arrijnë gjithnjë e më shumë nivele rekord, thuhet në raport.
Banorët e qyteteve evropiane janë gjithashtu gjithnjë e më të ekspozuar ndaj tymit toksik nga zjarret në pyje. Numri i ditëve që ata ishin të ekspozuar ndaj tymit u rrit me 7 për qind midis viteve 2003 dhe 2023, me qytetet në Evropën Jugore dhe Lindore të prekura veçanërisht.
Ngrohja globale po kontribuon gjithashtu në përhapjen e sëmundjeve infektive që deri më tani janë shoqëruar kryesisht me rajonet tropikale. Sipas studimit, sëmundje të tilla si dengu, zika dhe chikungunya po shfaqen gjithnjë e më shumë në qytetet evropiane, ndërsa mushkonjat që transmetojnë këto viruse bëhen më të zakonshme në Evropë.
