Facebook rikthehet në punë, ja çfarë thonë në kompani

Facebook fajësoi “konfigurimin e gabuar” për bllokimin prej rreth gjashtë orëve i cili pamundësoi 3.5 miliardë shfrytëzues të saj të kenë akses në mediat sociale, shërbime dhe shkëmbime të mesazheve në WhatsApp, Instagram dhe Messenger.

Kompania nuk tha se kush e bëri ndryshimin e konfirgurimit dhe nëse ishte planifikuar. Disa të punësuar në Facebook të cilët deshën të mbesin anonim thanë për Agjencinë e lajmeve Reuters se besojnë që deri te ndërpreja ka ardh për shkak të gabimit të brendshëm në mënyrën se si është drejtuar qarkullimi i internetit.

Defektet e pajisjeve të komunikimit të internetit dhe resurseve tjera që varen nga rrjeti i njejtë e kanë rritur problemin, u shprehën të punësuarit. Ekspertët e sigurisë nuk kanë përjashtuar mundësinë e gabimit pa dashje, por jo dhe sabotimit.

Pas mesnatës, në Facebook u shfaq në orën 00:54 dhe vetë Mark Zuckerberg. 

“Facebook, Instagram, WhatsApp dhe Messenger po kthehen online. Na falni për pengesat, e di se sa shumë mbështeteni në shërbimet tona që të jeni të lidhur me njerëzit që i keni aq shumë të dashur,” tha Zuckerberg.

Goditja e dytë

Rënia e Facebook nga rrjeti global ishte e dyta në pak ditë pasi sinjalizuesja Frances Haugen, ish-menaxhere produktesh në Facebook, tha të dielën në emisionin “60 Minutes” të televizionit CBS në SHBA, se hulumtimet e kryera nga vetë Facebook tregojnë se si kompania ushqen urrejtjen dhe keqinformimin, dhe çon në polarizim më të madh. Ajo po ashtu pretendon se kompania ishte në dijeni se Instagram mund të dëmtojë shëndetin mendor të vajzave adoleshente, dhe për këtë tha Haugen, ishte ankuar në mënyrë anonime te autoritetet federale të zbatimit të ligjit.

Pas kësaj akuze të sinjalizueses Haugen aksionet e Facebook kishin pësuar rënie, e më pas rënia ka vazhduar. Dhe derisa bota filloi ti drejtohej aplikimeve konkurrente si Twitter dhe TikTok, aksionet e Facebook pësuan rënie me 4.9 për qind, që është dhe rënia më e madhe ditore nga nëntori i vitit të kaluar, raporton Reuters.

“Më vjen keq për çdo kompani të vogël ose të madhe, familje ose individ që varen nga ne,” tha përmes rrjetit social Drejtori i përgjithshëm teknologjik, Mike Schroepfer, duke shtuar se duhet të kaloi një kohë që gjithçka të kthehet 100 për qind.

Facebook, që është shitësi më i madh i shpalljeve përmes internetit në botë pas Google, ka humbur rreth 545.000 dollarë në orë nga shpalljet në SHBA, vlerëson kompania Standard Media Index.

E Bloomberg shkruan se pasuria e Mark Zuckerberg për disa orë ka rënë për rreth 7 miliardë dollarë, që për pasojë e rrëzon në vendin e pestë të renditjes së njerëzve më të pasur në botë.

Aksionet e Facebook sot kanë rënë 5 për qind ose 15 për qind gjithsej që nga muaji shtator. Kjo ka bërë që Zuckerberg nga 13 shtator deri më sot të humb rreth 19 miliardë dollarë e pasuria e tij ka rënë nga 140 në 120.9 miliardë dollarë, e në renditjen e njerëzve më të pasur në botë tashmë është pas Bill Gates.

Vetëm rreth mesnatës ka filluar lidhja me rrjetin e internetit ose gjashtë orë pas rënies globale.

Ndryshe, vështirësitë me Facebook u shfaqën rreth orës 17 dhe rreth orës 17:40 pasoi rënia globale. Rreth mesnatës u vunë në punë serviset e Facebook ndonëse kishte probleme me shpalljen e përmbajtjeve të mesazheve. Filloi puna edhe e Instagramit, WhatsAppit dhe Messengerit, edhe pse probleme kishte përsëri me leximet e ngadalta ashtu si dhe komentet…