Fluks i madh në Morinë, 90 mijë udhëtarë kaluan kufirin në 5 ditët e para të gushtit

Pas muajit korrik shumë intensiv, pika kufitare e Morinit po përballon një fluks të madh udhëtarësh edhe në ditët e para të muajit gusht.

Sipas të dhënave të Ministrisë së Financave, gjatë muajit korrik, në kufirin shqiptaro-shqiptar janë përpunuar rreth 422 mijë udhëtarë dhe 130 mijë automjete.

Vetëm në pesë ditët e para të muajit gusht, përmes Morinit kanë hyrë në Shqipëri mbi 90 mijë pushues nga Kosova, mes tyre edhe pjesëtarë të diasporës.

Rritja e lëvizjeve lidhet me kulmin e sezonit turistik veror, ku shumë qytetarë të Kosovës zgjedhin bregdetin shqiptar për pushime.

Ndryshe, fluksi më i madh u regjistrua gjatë fundjavës së parë të muajit, me rreth 50 mijë hyrje.