S’është Karma, Reforma Territoriale është Kurvë!
nga Agim Popoci
Kryeministri Edi Rama u mundua kot tre vite më pare ti bind në forumin më të rëndësishëm ekonomik botëror, dhe dy vjet më parë kur iu drejtua Presidentes së Parlamentit Europian, Roberta Metsola, se Karma është Kurvë, sepse me hyrjen e tij në politikë Kurva e vetme që i shërbeu pushtetit të tij, fitoreve elektorale, kanabizimit të vendit dhe trafikut të kokainës, krimit dhe korrupsionit që menaxhoi, ishte dhe mbeti, Reforma Territoriale!
Ndërkohë, sa i përket Karmës, ajo nuk zë vend në fatkeqësinë që ka goditur shqiptarët me një Kryeministër të paaftë, ku qëllimi dhe veprimet e Edi Ramës ishin të qarta që nga dita kur bëri hapin e parë në politikë, dhe, sot, kur ka shkatërruar dhe varfëruar vendin, askujt nuk i intereson e ardhmja e tij, për të cilën vetëm ai është përgjegjës!
Pse tutori Edi Rama sërish u shfaq në semafor me Kurvën e tij, Reformën Territoriale, dhe, po pretendon se do të jetë më afër qytetarit me 46 bashki, pra, nga 61 bashki aktuale do ti zhduk nga faqja e dheut 15 prej tyre?!
Në vitin 2014, vetëm një vit pasi u bë Kryeministër dhe 15 vjet pasi ishte ratifikuar Karta Europiane e Autonomisë Vendore, Edi Rama me shpurën e tij u munduan të bindin shqiptarët dhe jo vetëm, se me shkrirjen e 373 njësive të qeverisjes vendore në 61 bashki që Shqipëria ka sot, pushteti do jetë më afër qytetarit, ndërkohë vendi ishte në prag të zgjedhjeve lokale!
Sot, askush nuk mund të thotë se nuk kishte vend për korrigjim të një sistemi me 308 komuna, 65 bashki dhe 12 qarqe, por pikënisja e kësaj Reforme nuk mund të ishte, “Fajet i ka Saliu”, ashtu siç e nisi Edi Rama me asqerët e tij, ku ishte e qartë se askush nuk ishte i shqetësuar për ofrimin e shërbimeve sa më të mira për qytetarin, pjesëmarrjen e tij në vendimmarrje, riorganizimin e bashkive dhe nevojën e madhe që kishte krijimi i bashkive të reja rurale për zhvillim ekonomik lokal që do të kuronin pabarazitë midis zonave rurale dhe urbane, reformë të thellë të politikave sociale dhe ekonomike, dhe, krijimin e një mekanizmi efikas për të frenuar shpopullimin.
Por, sot, gjithashtu, askush nuk mund të thotë se kjo shkrirje e 373 njësive të qeverisjes vendore në 61 bashki, që paradoksalisht u shoqërua me rritjen e kapaciteteve të administratës publike vendore, si dhe forcimin e strukturave administrative dhe komunitare, nuk u bë vetëm për qëllime elektorale!
Nuk është rastësi që pa u respektuar asnjë kriter logjik, i demografisë, terrenit, traditës dhe strukturës sociale, kokat e Edi Ramës u mjaftuan ti “dhurojnë” shqiptarëve mbi Fushë Krujë vetëm 16 bashki nga 61 sa u përcaktuan, dhe pa pikë turpi vendosën ti quanin bashki edhe ato 13 bashki të jugut që sot duan ti anulojnë!
Për fat të keq, por për efekt elektoral, sot Opozita e kundërshton reduktimin e numrit të këtyre bashkive duke përfshirë dhe Klosin e Fushë Arrëzin që penalizohen vetëm për shkak të strukturës elektorale, pa i bërë një eko reale Reformës Territoriale të vitit 2014!
Edi Rama me Kurvën e tij mund të vazhdoj të qëndroj në semafor dhe ti pres zgjedhjet e radhës duke vazhduar ti quaj bashki pa pikë turpi edhe Delvinën dhe Konispolin, por, nëse sot Opozita nuk e thotë, Reforma e vitit 2014 e dëshmoi se ato i shërbyen vetëm Partisë Socialiste dhe askujt tjetër, po aq sa Maliqi, Dimali, Cërriku, Divjaka, Përrenjasi, Patosi, Belshi, Rrogozhina, Selenica, Poliçani, Memaliaj, Këlcyra dhe Libohova, për të cilat Kryeministri thotë se kanë dështuar dhe do të shkrihen se nuk i shërbejnë më këtij vendi.
Sot këto 15 bashki mund të protestojnë me të drejtë pse po shkrihen, por janë po këto bashki që nuk protestuan për asnjë ditë pse u keqtrajtuan me ndarjen e buxheteve të tyre nga Edi Rama, pse nuk po funksionojnë dot, pse iu dhunua decentralizimi i tyre, pse demokracia vendore nuk po funksionon për shkak të ndërhyrjes nga pushteti qendror, madje nuk reaguan edhe kur kuadrot e tyre që i shërbyen Tutorit, zunë vend në mënyrë masive në Tiranën e kontradiktës, pa dhënë llogari në bashkitë respektive ku u ngritën për të drejtuar dhe ndikuan edhe në masë të madhe në shpopullimin e tyre.
Sot, Edi Rama me forcën e kartonit mund ti shkrijë edhe ndonjërën nga 14 bashkitë që i la mbi Fushë Krujë i bindur në solidaritetin e madh e madh që ka dhe për të cilin i flasin çuçët e muçët, por, detyrë e Opozitës është që përveç propozimit për 100 bashki, të sjell një analizë për të 16 bashkitë që ishin në Veri dhe nuk funksionuan dot, ashtu si dhe 13 bashkitë që do shkrihen në Jug.
Dhe, të bëhet edhe një analizë e betejave elektorale nga viti 2014 kur Reforma u vu në jetë!
Shqiptarët dhe jo vetëm, duhet ta kuptojnë se si humbi Opozita në Elbasan edhe pas ndërtimit të tunelit dhe afrimit të Tiranës me këtë qark në vetëm 15 minuta, ndërtimit të të gjitha rrugëve rurale në Berat dhe ndryshimit të strukturës infrastrukturore në Fier, Gjirokastër e Vlorë, si u ripushtua nga komunizmi, Saranda, Memaliaj, Lezha, Tropoja dhe së fundi edhe Shkodra, dhe, pse e përqafuan krimin komunist të Edi Ramës të gjitha fermerët edhe pas investimeve madhore në Bujqësi!
Gjithashtu, përveç raporteve të lodhshme të OSBE-ODIHR, shqiptarët përveç se gotës gjysmëbosh duhet të shohin fakte reale se si ndikoi kjo administratë kriminale në zgjedhje, si i shndërroi këto bashki në shtabe elektorale dhe zyra punësimi të patronazhistëve, që përveç manipulimit zgjedhor kontrollojnë çdo krim që zhvillohet në sy të autoriteteve shtetërore ashtu siç bënë me devotshmëri me kultivuesit e marijuanës. Sot, Edi Rama mund të flas për reformimin dhe riorganizimin territorial si dhe rolin e qeverisjes vendore në integrimin në Bashkimin Evropian, por është e domosdoshme ti thuhet këtij dështaku se, sot, Shqipëria funksionon me një bashki të vetme, Tiranën, të gjitha të tjerat janë të pakuptimta si Përrenjasi dhe të panevojshme si Libohova, pavarësisht se syri i tij prej Tutori në semafor vazhdon dhe korrigjon atë që gjykon se duhet korrigjuar vetëm në bazë të klientelës së ditës, që i paraqitet në telefon nga Brukseli!
