FOTO/Peshkaqenë tigër kapen nga peshkatarët në Durrës…

Me ngrohjen e ujit të detit, peshkatarët po gjuajnë në thellësi të Adriatikut. Thellësia ka edhe mjaft surpriza. Një anije peshkimi ka zënë një sasi të konsiderueshme këlyshësh peshkaqenësh tigër me pesha afërsisht mbi 10 kg dhe gjatësi të përafërt me 1 metra.

Nga informacioni i marrë në peshkim, 2 ditë më parë një anije ka rënë në masë peshkaqenësh larg bregut, të përafërt me këto që po paraqesim. Në rrjetat e anijes kanë mbetur të kapur rreth 35 copë të tillë me gjatësi uniforme rreth 1 metër. Peshakatarët thonë se janë peshkaqenë të parrezikshëm, të ndryshëm me ato lloje që kanë 3 radhë dhëmbësh.

Këto peshkaqenë nuk i përkasin filmave horror të Spilbergut, por janë lloje që pastrojnë ujërat detare nga kafshët dhe speciet e ngordhura, shkruan Durreslajm. Peshkatarët në përgjithësi i klasifikojne peshkaqenët si kafshë jo të rrezikshme. Në detin Adriatik dhe Jon nuk ka pasur sulme nga peshkaqenët. Edhe peshkaqenët gjuajtës si ato të bardhët dhe tigër etj, në këto periudha përqendrohen zakonisht në zona katastrofash humane ku ka mbytje masive si ato që po ndodhin në Mesdhe me transportet klandestinë të refugjatëve.

Në thuajse dy shekuj, rreth 97 për qind e peshkaqenëve oqeanikë janë zhdukur, një dëmtim evident për ambientin dhe për ne, duke parë rëndësinë e tyre për ekuilibrin e ekosistemit. Në shumë vende i vrasin në mënyra mizore.