Gabriel Escobar sot në Kosovë

Sot Kosovën e viziton I dërguari i Shteteve të Bashkuara për Ballkanin Perëndimor, Gabriel Escobar, me mesazhe të qarta për dialogun Kosovë-Serbi dhe ripërsëritjen e obligimeve që Prishtina zyrtare ka karshi marrëveshjeve të arritura në kuadër të dialogut.

Mësohet se përfaqësuesi i posaçëm i SHBA për Ballkanin Perëndimor, do të zhvilloj takime me Presidenten Vjosa Osmani, Kryeministrin Albin Kurti dhe liderët e partive opozitare.

I dërguari amerikan qysh dje paralajmëroi nga Brukseli se pret që Kosova dhe Serbia ta marrin seriozisht dialogun pasi e vlerësoi se dialogun është në një moment kritik, ndërsa pritet të diskutohet dhe çështja e ndalimit të përdorimit të dinarit serb.

“I inkurajoj të dyja palët të zbatojnë marrëveshjet e arritura, sidomos atë të arritur në Ohër. Kjo është njëra ndër arsyet primare që po vizitojë Kosovën,” tha dje Escobar duke shtuar se “Kosova duke injoruar dialogun po injoron partnerët evropianë”.

Gabriel Escobar ka përsëritur që Shtetet e Bashkuara nuk e kundërshtojnë legjitimitetin e vendimit të BQK-së, mirëpo kanë probleme me mënyrën e zbatimit dhe për ndikimin që ka te komuniteti serb.

Ndryshe, sot I dërguari i Shteteve të Bashkuara për Ballkanin Perëndimor, Gabriel Escobar, viziton Kosovën në kuadër të turit tetëditor në Belgjikë, Austri dhe Mal të Zi.