Gazetarja ruse Daria Aslamova shpallet person i padëshirueshëm në Kosovë

Ministri i Brendshëm i Kosovës, Xhelal Sveçla, ka bërë të ditur se gazetarja ruse, Daria Aslamova është shpallur person i padëshirueshëm.

Përmes një postimi në rrjetin social Facebook, ai tha se Aslamovas i është ndaluar hyrja në Kosovë për pesë vjet.

“Kushdo që me qëllime apo direktiva të caktuara, cenon apo tenton të destabilizojë vendin tonë, do të përballet pa diskutim me forcën e ligjeve të Republikës së Kosovës,” tha ndër të tjera Sveçla.

Daria Aslamova është arrestuar nga Policia e Kosovës në veri më 6 gusht, raporton RFE. Duke bërë të ditur arrestimin e saj, Sveçla tha se shumë shtete e kanë vërtetuar se ajo ka qenë e angazhuar në spiunazh për inteligjencën ushtarake ruse dhe se ka vepruar në petkun e gazetares.

“Ajo ka marrë pjesë edhe në luftimet në Ukrainë duke propaganduar mbi pushtimin rus ndaj Ukrainës”.