Gjykata e Firenzes fundos 8 shqiptarët e arrestuar nga antidroga e Livornos…
Gjykata e Firenzes ka dhënë dënime ekzemplare ndaj 8 të arrestuarve në mars të vitit 2017 në kuadër të operacionit “Pavarësia”, seksioni antidrogë i Livornos dhe i koordinuar nga Drejtoria rajonale antimafia e Firenzes.
Në vendimin e gjykatës përfshihen 73 vjet burg për 8 shqiptarët e akuzuar për trafik dhe shpërndarje së substancave narkotike që vepronte mes Livornos, Pisas, Massa Carrara, Pratos e Parmës.
Operacioni “Pavarësia”, i kryer më 21 mars 2017, çoi në arrestimin e të pandehurve, ndërkohë që më parë ishin ekzekutuar 12 arreste në flagrancë dhe ishin sekuestruar sasi të mëdha droge, 53 kg heroinë dhe 3 kg kokainë, rreth 31 mijë euro para cash, si dhe disa automjete.
Dënimet e dhëna për çdo anëtar të bandës shkojnë nga 6 vjet e 8 muaj deri në 16 vjet burg.
Dënimi parashikon konfiskimin e 2 pronave në Parma, 6 veturave (duke përfshirë një BMË Seria 1 dhe një Mercedes A clas), një kamion, 5 motoçikleta, si dhe dy llogari bankare, të ardhura nga veprimtaria e paligjshme e grupit.
Dënimet
- K. S. (1984) – 16 vjet burg;
- L. I. (1984) – 9 vjet e 4 muaj burg;
- S. R., (1989) – 9 vjet e 8 muaj burg;
- S. E. (1996) – 8 vjet e 8 muaj burg;
- H. K. (1991) – 8 vjet burg;
- P. E. (1990) – 8 vjet burg;
- K. Ra. (1973) – 7 vjet e 4 muaj burg;
- M. E. (1997) – 6 vjet e 8 muaj burg.
