Heshtja rraskapitëse e “bushatëve”!

nga Agim Popoci

Në vitin 2011 ndërsa po realizoja një dokumentar për kriminelin komunist Tuk Jakova, në fund të intervistës së tij me bashkëshorten Mita Jakova, e pyeta nëse kishte ndonjë merak, ajo mu drejtua:

-Të lutem, mos e prej atë pjesën ku tregoj se si Mehdi Bushati, mori në pyetje vajzën time dhe e çmendi. Ja në atë dhomën me hekura është!

-Pse duhet ta pres, e pyeta i habitur?!

-Po, e kam dhënë një intervistë te Blendi Fevziu, dhe më kishte prerë atë pjesën ku flisja për të atin e Andi Bushatit, Mehdiun!

Nuk e kuptova pse ishte prerë kjo pjesë e rrëfimit të Mita Jakovës, pikëpyetjet mu shtuan kur pashë me sy se si ka përfunduar njëra nga viktimat e Mehdi Bushatit, që ishte dhe nxënëse me të gjitha 10-ta dhe sot qëndronte nën hekura në një dhomë të errët, por me kohë, veprat kriminale në media të Andi Bushatit dhe “bushatëve” të tjerë, sqaruan shumë gjëra.

Prezenca e Andi Bushatit në media dhe “bushatëve” të tjerë, nuk është vetëm për të prerë dhe shtuar në tekste dhe filmime ato që kanë bërë kriminelët komunistë dhe sot bien në kundërshtim me politikën e partisë kriminale PPSH, tashmë me gëzofin e ri, PSSH, por si opinionbërës për të krijuar dhe sajuar intriga kundër oponentëve të kriminelëve komunist në pushtet.

Pasi mbështeti Edi Ramën si Kryetar të Bashkisë Tiranë përballë malokut Besnik Mustafaj, dhe për kryeministër përballë malokut Sali Berisha, sot kur s’ka malokë për armik politik ama ka një Edi Ramë që shpërfillë të gjithë “bushatët” meqë nuk i duhet më ky grup i intrigantëve komunistë që lëvizin levat e opinionit, Andi Bushati i vënë në shërbim të Ilir Metës, “shqetësohet” dhe konstaton se Kryetari i PD, Lulzim Basha, arriti të zhgënjejë edhe ata që nuk kanë pasur kurrë shpresë tek ai.

Se si mund të zhgënjehesh tek ai që nuk ke shpresa këtë vetëm një kriminel si Mehdi Bushati mund ta dijë; Ndërsa me heshtjen uluritëse të Lulzim Bashës, pasi Presidenti i Republikës publikoi në “Opinion” mesazhet e dy ambasadave kryesore në vend ku konfirmohet se bënin allishverishe me Edi Ramën, për të zgjedhur në mënyrë të kundraligjshme anëtarët e Gjykatës Kushtetuese, duke përzgjedhur pritjen e Ambasadores amerikane Yuri Kim, që të flas për të ardhmen dhe jo krimet e së shkuarës, mund të shqetësohesh në mënyrë uluritëse vetëm nëse je i biri i një krimineli komunist si Mehdi Bushati.  

I biri i Mehdiut e  konsideron heshtje komprometuese dhe një indiferencë të frikshme, këtë shembull flagrant, përpos varrosjes së një skandali, qoftë për shkaqe xhelozie ndaj protagonizmit burrëror të Metës, qoftë për frikën nënshtruese ndaj ndërkombëtarëve apo qoftë prej ndonjë flirti në distancë me Ramën, siç përflasin gojët e liga, ngre për të disatën herë të njëjtën pyetje: a është i aftë ta drejtojë kauzën e vështirë opozitare, Lulzim Basha? A ngjall ai shpresë, pasi ka lënë pas kufomat e Republikës së re, premtimet për transformimin e sistemit, përmbysjen e ndryshimeve kushtetuese të 2008-ës, zotimet për referendume dhe betimet se reforma zgjedhore nuk mund të bëhej as me ata që kanë vjedhur votat, as me përfaqësuesit e opozitës fals?

Duke e shpërfill faktin se “zbulimin” e këtij skandali e bëri njëri ndër njerëzit më të korruptuar në Shqipëri, i biri Mehdiut mendon se heshtja ndaj krimeve të babait të tij dhe mungesa e kërkimfaljes ndaj viktimave, do të pason me heshtjen  e krimeve të tij. Por e ka shumë gabim!

E para, Andi Bushati duhet të numëroj kufomat e të atit Mehdi Bushati në mënyrë që të gjithë ata që i lexojnë dhe pse jo i mbështesin opinionet e tij, pasi ka raste që janë cituar nga zyrtarët e PD, ta kuptojnë se kemi të bëjmë me një bir krimineli, që në këtë jetë, nuk e ka të drejtën e fjalës sepse deri më sot nuk e ka marrë mundimin as të turpërohet për këto krime. Mjafton dëshmia e të burgosurit politik, Demir Pojani dhënë gjatë një interviste në “Rrno për me tregue” të Nebil Çikës, për të kuptuar se kush bënë sot opinione dhe merr guximin ta mëson opozitën se si luftohet komunizmi.                                                                                           

“Pas revoltës së Spaçit na arrestuan dhe na sollën në Tiranë për ridënim. Kjo hetuesi qe një tmerr i vërtetë. Unë pata fatin e keq të kem hetues Mehdi Bushatin. Njeri me përbindësh nuk kam parë. Të tërbuar nga Revolta e Spaçit përdoren çdo lloj torture mbi ne. Ky ua kalonte të gjithëve! Unë isha i madh nga trupi dhe i fuqishëm, ai i vogël me ca këmbë të shtrembëta e nuk kënaqej vetëm me të rrahur. Më kërcente në shpinë, në karrigen ku unë isha i lidhur, e më kafshonte nga inati damarët e qafës ose gishtërinjtë e duarve të lidhura. Mbushte gojën me gjakun tim dhe ma pështynte në fytyrë…Mendoni vetë ç’kemi hequr. Këto nuk harrohen, por edhe po te duam nuk na lënë. Ky u merrte shpirtin e u pinte realisht gjakun njerëzve në hetuesi, i biri, ky Andi Bushati del çdo ditë në TV na flet e na jep leksione për demokracinë e shtet ligjor…çfarë fyerje për ne viktimat!“

Nëse as kjo nuk e turpëron Andi Bushatin dhe fakti që ky kriminel e ka rritë dhe edukuar se çfarë është jeta, edhe vetë nuk e ka të drejtën morale të flas pas mbështetjes që i ka bërë Ilir Metës si Kryeministër, më pas akuzave për këtë njeri që erdhi sërish në pushtet dhe guxoi e mori lekë në zyrë, shkaktoi 21 Janarin dhe u kthye në prehrin e Edi Ramës.

Se si mund të bëjë protagonizëm burrëror Ilir Meta, atë e din tashmë djali i kriminelit Mehdi Bushati ndërsa për frikën nënshtruese ndaj ndërkombëtarëve, me heshtjen në rastin e Metës Kryeministër, Andi Bushati e ka liçencuar heshtjen përjetë të jetëve, qoftë ajo uluritëse ose rraskapitëse; Po, nëse tregon se kishim të bëjmë me një heshtje të blerë dhe tashmë për një hapje goje të këtij lloji, atëherë bashkëmendimtarët e tij komunistë e kuptojnë. Madje edhe ata që ndjejnë kënaqësi nga shkrimet e tij dhe vijnë nga e djathta shqiptare, dhe nuk ndjejnë keqardhje për veten e tyre se po krijojnë opinion nga një bir krimineli që i ka torturuar dhe vrarë, dhe sot është në shërbim të partisë kriminale të të atit.

A ngjallë apo jo shpresë Lulzim Basha ky nuk është shqetësimi i Andi Bushatit dhe partisë kriminale që i shërben ama patjetër që është shqetësim deklarata e Ambasadores së SHBA, Yuri Kim, se me Bashën folën për të ardhmen. Dhe, shqetësimi bëhet edhe më i madh kur në projeksionin e “bushatëve”, Basha është pa ide të qarta, pa ideale të afishuara dhe pa koherencë në qëndrime!         

Por Andi Bushati është kujdesur edhe për ata që dyshojnë se i ati mund të ketë lënë gjurmë kriminale tek i biri opinionbërës i së majtës revolucionare, i futur tashmë edhe ndër demokratët e pakënaqur.

I biri Mehdiu pyet se a merr më njeri armët për ta ndjekur Lulzim Bashën pas në luftën e tij, pasi i ka thirrur njerëzit në dy revolucione të tradhtuara? Pra, postulati se djali i një doktori bëhet shumë më lehtë doktor i mirë, ashtu si dhe djali i një prokurori ka predispozita të bëhet më lehtë prokuror i mirë, këtu zë vend. “Bushatët” fitoren e mendojnë me armë ashtu siç menduan në vitin 1997 me gazetën “Koha Jonë” dhe rikthyen komunistët në pushtet!

Por i biri i Mehdiut shkon më larg, duke përcaktuar edhe epilogun në zgjedhje, që sipas tij, Lulzim Basha i ka shancet e barabrta me zero. Dhe jo vetëm kaq!

Të keqen e sheh sikur edhe të fitoj Lulzim Basha dhe të ruhen karakatinat e Edi Ramës. Në këtë rast, opinionbërësi nga radhët e kriminelëve komunist thotë se përgjigja duhet të jetë e prerë: “JO faleminderit”.

Nuk ka se si të jetë ndryshe! Sot kur shqiptarët janë më të varfër se kurrë, kur kriminelët komunistë shqiptarë janë më të pasur se kurrë, i biri Mehdi Bushatit me shokë, edhe pas 30 vitesh do të sjellë në krye të Partisë Demokratike sërish njeriun e tyre.

Në mungesë të fisnikërisë, i biri i një krimineli nuk ka se si flet ndryshe. U thotë shqiptarëve ta refuzojnë Lulzim Bashën Kryeministër nëse shqiptarët do të kenë ppp-të e Edi Ramës pa e lënë Bashën të flas se cili është Plani i tij qeverisës! Madje, shqiptarëve që nuk kanë as bukë të hanë nën këtë regjim komunistë, u tregon kutinë ku (nuk)do të hedhin votën; Dhe, nga ana tjetër, kur pavarësisht se cili është fituesi, ai nuk i thotë vetes të heqë dorë nga përfitimet që i sjellin reklamat e tri kompanive më të mëdha celulare në vend që menaxhohen nga Partia Socialiste!    

Në fund, po të mos ishte bir krimineli, do të kishte edhe pak fisnikëri dhe nuk do ta hapte barkun për Edi Ramën që e solli në pushtet dhe sot nuk i hap as telefonin. Fisnikëri, të cilën nuk mund ta kenë “bushatët” edhe pa këtë krim të radhës me Lulzim Bashën, e që mund ta gjejnë tek rast i kriminelit komunist Tuk Jakova! Njëri nga ata që pësuan nga krimet e Tukut, Dedë Gjon Marka Gjoni i cili vuajti mbi 40 vjet heqje lirie, kur e pyeta se çfarë mendimi ka sot për Tuk Jakovën, ky njeri i fisëm i një familje zemërmadhe mirditore më tha, vetëm kaq:

Marangoz i shkreti!