Hetimet për Ish-Zv/Kryeministrin Arben Ahmetaj, SPAK sekuestron një vilë në Palasë

Sekuestrohet me urdhër të Prokurorisë së Posaçme Kundër Korrupsionit dhe Krimit të Organizuar, SPAK, një vilë në Palasë.

Prokuroria e Posaçme, në kuadër të hetimeve që po kryen për Ish-Zv/kryeministrin Arben Ahmetajn, raporton BW, ka vendosur nën sekuestro një vilë e cila ndodhet në një kompleks rezidencial në Palasë.

Sipas SPAK është një pronë, e cila vërtetohet përmes dokumenteve të tjera se i përket ish-bashkëshortes së Ahmetajt dhe për sa kohë nuk i disponon të ardhurat për blerjen e kësaj prone duhet të sekuestrohet. Po ashtu sot është sekuestruar edhe një vilë në Hamallaj që i përket bashkëjetueses së tij, Erjola Hoxha.

Më 9 mars, Byroja Kombëtare e Hetimit ka kryer kontrolle në shtëpinë e ish- gruas dhe partneres aktuale të Ahmetajt.

Ish-Zv/kryeministri, aktualisht deputet i PS-së ka ankimuar, raporton BW, pak ditë më parë vendimin për kontrollin e banesave të ish-gruas dhe partneres së tij. Arben Ahmetaj kërkon nga Apeli i GJKKO shpalljen të pakushtetueshëm dhe të paligjshëm të vendimit të Gjykatës së Posaçme të Shkallës së Parë.