Hungaria dëbon 10 diplomatë rusë. MPJ e Rusië: Përgjigja do të jetë e dhimbshme!
Qeveria e Hungarisë bëri të ditur se kishte urdhëruar 10 anëtarë të misionit diplomatik rus të largoheshin nga vendi për aktivitete të konsideruara të papranueshme për diplomatët.
Ambasadorit rus iu tha se “sipas vlerësimit të autoriteteve hungareze, 10 anëtarë të misionit rus janë përfshirë në aktivitete në Hungari që janë të papranueshme për diplomatët sipas Konventës së Vjenës,” tha Ministrja e Jashtme e Hungarisë Anita Orbán. Kjo është një marrëveshje ndërkombëtare që rregullon sjelljen e diplomatëve.
Ministrja e jashtme, e cila nuk ka kurrëfarë lidhje me ish-kryeministrin Viktor Orbán, nuk specifikoi se cilat ishin aktivitetet ose sa kohë kanë diplomatët rusë për t’u larguar nga Hungaria. Megjithatë, ajo theksoi se vendi i saj dëshiron të mbajë kontakte diplomatike me Moskën.
“Ky vendim mbron sigurinë dhe sovranitetin e Hungarisë. Nuk nënkupton ndërprerjen e marrëdhënieve diplomatike me Rusinë. Hungaria synon të vazhdojë dialogun e nevojshëm, bazuar në respektin e ndërsjellë dhe respektimin e rregullave,”, tha Orbán përmes një deklarate.
Rusët paralajmërojnë përgjigjen
Ministria e Jashtme e Rusisë bëri të ditur përmes një deklarate për Agjencinë shtetërore ruse të lajmeve RIA Novosti se do t’i përgjigjej dëbimit. “Përgjigja ndaj lobit rusofobik në Budapest do të jetë e mprehtë dhe e dhimbshme,” tha zëdhënësja e Ministrisë së Jashtme ruse, Maria Zakharova, për TASS.
Hungaria mori vendimin gjatë mandatit të Kryeministrit Péter Magyar, i cili mori detyrën në fillim të këtij viti me një premtim për t’i dhënë fund politikave proruse të vendit.
Paraardhësi i Magyar, Viktor Orbán, ishte një aleat i Presidentit rus Vladimir Putin. Orbán ka vonuar ose bllokuar vazhdimisht sanksionet evropiane kundër Rusisë dhe ka arritur marrëveshje energjitike me Moskën.
