I dërguari i Gjermanisë: Asociacioni është “gëlltitur” nga pala kosovare. Lista Srpska…

“Përshtypja ime është se për palën kosovare, çështja shumë e vështirë e Asociacionit të komunave me shumicë serbe tashmë është gëlltitur,” tha I dërguari i qeverisë gjermane për Ballkanin Perëndimor, Manuel Sarrazin, ndërsa i konsideron të papranueshme kërkesat e Listës Srpska si kusht për tu futur në zgjedhje dhe institucionet që i braktisën.

Në fund të vizitës së tij në Kosovë dhe duke u nisur drejt Beogradit ku do të zhvillojë takime me zyrtarët më lartë institucional dhe politikë, Manuel Sarrazin, tha për median serbe KoSSev, se Marrëveshja e Ohrit për të cilën janë dakorduar kryeministri i Kosovës dhe Presidenti i Serbisë, është një rast i rëndësishëm për gjithë rajonin në rrugën drejt Bashkimit Europian.

“Shumë njerëz në rajon do të thonë se jam idiot që besoj në lëvizje pozitive, por, Ne në kuadër të Procesit të Berlinit kemi dëshmuar se është e mundshme të arrihen marrëveshje pozitive nëse mendohet pozitivisht, dhe mendoj se Ohri mund të jetë pikë e kthesës që situata në rajon nga minus-minus të shndërrohet në plus,” tha Sarrazin duke e pranuar se Gjermania kishte bërë presion të fortë tek të dyja palët që të arrihet marrëveshja në Ohër.

“Kemi bërë përpjekje t’ju themi – ‘dëgjoni, ky është shansi juaj, mos e lëshoni këtë shans, ndoshta nuk do të keni shumë raste të reja’,” tha i dërguari i qeverisë gjermane ndërsa vlerëson se shumica nuk besojnë në vullnetin politik që u tregua në Ohër.

“Pra, vendimtare është që tani, përmes zbatimit, të konfirmohet vullneti politik,” konstaton Sarrazin duke refuzuar të flas në detaje rreth termit “vetëmenaxhim për serbët”, që theksohet në Nenin 7 të marrëveshjes bazë si detyrim i Prishtinës, por gjithsesi tha se tashmë është e qartë se duhet të zbatohen të gjitha marrëveshjet nga viti 2013 dhe 2015 mbi Asociacionin.

“Përshtypja ime është se për palën kosovare, Asociacioni i komunave me shumicë serbe është një çështje e vështirë që tashmë është gëlltitur. Edhe Gjermania me partnerët ndërkombëtar gjithmonë ishin të qartë se presim që Kosova ti zbatoj këto marrëveshje, e përshtypja ime është se tani kjo është pranuar. Ndoshta po gaboj, por kjo është përshtypja nga mbledhjet e mia në Prishtinë, se kanë bërë hapa para. Dhe, presim që këtë ta dëshmojnë edhe në terrem në ditët dhe javët në vijim,” tha Sarrazin.

Mesazhet e autoriteteve kosovare i vlerëson të besueshme, megjithëse thekson se në Ballkanin Perëndimor “kurrë nuk i dihet”, por, të ndihmon kur i mbanë njerëzit për fjale dhe u thua:

“Ju dëgjojmë ato që thoni publikisht, por do ti qëndrojmë asaj që kemi thënë.“

E pranon Beogradi dhe Prishtina kanë vizione të ndryshme për Asociacioni, por vlerëson se marrëveshje e pranueshme për të dyja palët mund të arrihet.

Në fund ka dhe një mesazh për Listën Srpska e cila ka vendosur ti bojkotoj zgjedhjet në Veri të Kosovës.

“Në Gjermani kemi një shprehje në politikë kur dikush largohet: ‘Ai i cili del nga dhoma duhet të mendohet mirë se si do të futet përsëri’,” tha Sarrazin duke konstatuar se Lista Srpska për momentin nuk ka strategji se në çfarë mënyre të futet përsëri, e sa i përket kërkesave të kësaj partie si kush për tu kthyer në institcione dhe për të marrë pjesë në zgjedhje, njëra prej të cilave është formim i Asociacionit, I dërguari i qeverisë gjermane për Ballkanin Perëndimor, Manuel Sarrazin, ka një mesazh të qartë:

“Ne dëshirojmë që kjo të ndodhë dhe po bëjmë përpjekje që të ndihmojmë për këtë çështje, por nuk do ta komentoja dhe nuk do ta fusja në rendin e ditës, renditjen që ka prezantuar Lista Srpska!“