I dërguari i Melonit në tokën shqiptare: Zoti kur krijoi Shqipërinë ishte e diel dhe e kishte pushim!
Për të kuptuar se pse Kryeministri Edi Rama i jep në dispozicion Kryeministres së Italisë, Giorgia Meloni, bregdetin shqiptar për të sistemuar emigrantët që Meloni kishte premtuar se do ti dëboj, Rama u sqarua sot në Konferencën për Sigurinë e Turizmit pa e pyetur njeri. Duke iu referuar shpesh librave të shenjtë, sot foli në cilësinë e Të dërguarit në tokën shqiptare jo i perëndisë por Kryeministres italiane Meloni ndonëse dha detaje se Zoti kur krijoi Shqipërinë e kishte pushim dhe ishte ditë e diel, e kur bëri shqiptarët ishte i zënë dhe i stresuar!
“Ne jemi vend i vogël, por kemi një bekim shumë të madh. Zoti kur bëri Shqipërinë e bëri ditën e diel kur ishte pushim. Në 28 mijë km2 a futur çdo gjë, dy dete, 9 lumenj, male, lugina fantastike, pasuri nëntokësore, çdo gjë që mundshme dhe të imagjinueshme për ta patur në një distancë shumë të shkurtër, zoti e ka futur në hartën e Shqipërisë,” tha Edi Rama duke sqaruar njëherë e mirë pse aty ku Zoti futi çdo gjë, I dërguari i Melonit do të fus edhe emigrantë nga Afrika që janë nisur drejt Italisë sepse kryeministrja italiane nuk i honeps dot.
Me këtë rast kishte një përgjigje dhe për arsyen se pse e durojnë kaq shumë shqiptarët këtë lloj Kryeministri që i përdhunon edhe mendërisht.
“Nuk e di çfarë intensiteti pune ka patur kur bëri shqiptarët, por kur bëri Shqipërinë ishte e diel dhe e kishte pushim. Kur bëri shqiptarët ka qenë shumë i zënë me siguri dhe në një moment stresi ka nxjerrë shqiptarët. Dhe nga ai moment stresi shqiptarët dolë aq sa të jashtëzakohshëm kur janë vetëm dhe kur janë përballë një sfide ku nuk kanë kujt t’i drejtohen tjetër veç forcave të veta si individë, hidhi ku të duash, aq edhe të jashtëzakonshëm pastaj për t’u ngrënë me njëri-tjetrin.“
Dhe, për një çështje kaq serioze si turizmi, Edi Rama nuk e lodhë kokën si Kroacia, Greqia, Italia ose Spanja, por mjaftohet me shfaqjen e dëshirës për turistë cilësor aty ku vendos afrikanët e Melonit.
“Shqipëria ka hyrë në Champions League e konkurrencës në turizëm dhe ky është sa një moment historik, aq edhe sfidash të gjithanshme. Ne kemi hyrë në Champions, por duhet të mbetemi në Champions, Italia, Greqia, Franca, Spanja, Kroacia, Sllovenia nuk bien nga Champions, nuk shkojnë në kupën UEFA. Tani është momenti që Shqipëria të kërkojë turistë cilësorë që sjellin më shumë të ardhura në buxhet.”
