Inceneratorët, SPAK lëshon 20 urdhër arreste. 7 të arrestuar, në pranga Drejtori i Albpetrolit

Prokuroria e Posaçme kundër Krimit të Organizuar dhe Korrupsionit, SPAK, ka lëshuar 20 urdhër arreste për çështjen e aferës së inceneratorëve. Deri më tani janë ekzekutuar 7 prej tyre, 5 të tjerë janë shpallur në kërkim dhe 8 do të hetohen në gjendje të lirë.

Në pranga ka përfunduar drejtori i Albpetrol Florian Muçaj, i cili ishte anëtar i Komisionit të Prokurimit për incineratorin e Fierit. Një tjetër i akuzuar është Administratori i Inceneratorit të Fierit, Loran Dusha, që është në pronësi të “Integrated Technology Services” ndërkohë urdhër arresti është lëshuar edhe për Administratoren e inceneratorit të Tiranës, Ariola Kodra.

Ndryshe, pas denoncimeve nga opozita SPAK ka filluar hetimet për çështjen e inceneratorëve, për të cilën u ngrit edhe një Komision Hetimor për inceneratorët e Fierit, Elbasanit dhe Tiranës.. Në fund të hetimeve, SPAK lëshoi 20 urdhër arreste ndërkohë mësohet se në mesin e këtyre urdhër arresteve nuk ka asnjë kërkesë për zyrtarë të lartë, deputetë apo ministra ndonëse opozita i akuzoi edhe me emra .

Për këtë aferë korruptive, kohë më parë është arrestuar Ish-Ministri i Mjedisit, Lefter Koka, dhe janë shpallur në kërkim ndërkombëtar Administratorët e inceneratorëve, Klodian Zoto dhe Stela Gugallja.