Irani, së shpejti do lirohet ekuipazhi i anijes së lidhur me Izraelin

Ekuipazhi i një anije të konfiskuar me flamur portugez, e cila është e lidhur me Izraelin, pritet të lirohet së shpejti, tha ministri i Jashtëm i Iranit, Hossein Amir-Abdollahian, raportuan sot mediat iraniane.

Trupat e Gardës Revolucionare Islamike të Iranit, raporton RFE, e konfiskuan anijen MSC Aries së bashku me 25 anëtarët e ekuipazhit të saj në Ngushticën e Hormuzit më 13 prill, pak ditë pasi Teherani ishte zotuar se do të hakmerrej kundër një sulmi të dyshuar izraelit në konsullatën e tij në Damask të Sirisë.

Irani kishte thënë asokohe se do ta mbyllte tërësisht këtë ngushticë, e cila është rrugë shumë e rëndësishme tregtare.

Sulmet kundër anijeve të mallrave kohëve të fundit në Detin e Kuq dhe në Gjirin e Adenit nga grupi jemenas, Huthi, i cili është i lidhur me Iranin, e kanë trazuar transportin tregtar botëror.

Grupi Huthi, raporton RFE, është shprehur se po i kryen këto sulme në shenjë mbështetjeje për palestinezët në Rripin e Gazës, të cilët janë duke u përballur me një luftë tashmë gjashtëmujore me Izraelin.