Dita e personave të pagjetur, Osmani: Edhe sot Serbia vazhdon të flejë mbi varreza

Edhe sot Serbia vazhdon të flejë mbi varreza, tha Presidentja e Kosovës, pas homazheve në Ditën kombëtare të Personave të Pagjetur, e bindur se liria do të jetë kuptimplotë vetëm atëherë kur na kthehen edhe personat e zhdukur.

“Është një dhimbje që ta shpon shpirtin sepse për dallim që kanë humbur më të dashurit, familjen nuk kanë se ku t’i vendosin kurora me lule. Siç po e shohim edhe nga shoqatat e personave të zhdukur, një numër i madh i tyre janë fëmijë të vegjël. Edhe sot Serbia vazhdon të flejë mbi varreza. Njëherë e kreu krimin dhe më pas bëri çmos që ta fsheh krimin edhe 25 vjet më pas vazhdon ta bëjë të njëjtën,” tha Presidentja e Kosovës pas homazheve te memoriali për të Pagjeturit, së bashku me ministrat e kabinetit qeveritar dhe ambasadorë të akredituar në Kosovë, duke u zotuar:

“Si institucione të Kosovës do të jemi pranë familjeve që ta ndajmë dhimbjen së bashku sepse të zhdukurit me dhunë janë familjarë të të gjithë qytetarëve të Republikës së Kosovës. Liria do të jetë kuptimplotë vetëm atëherë kur na kthehen edhe personat e zhdukur.”

Ndryshe, sot kur kanë kaluar më shumë se 25 vjet nga përfundimi i luftës në Kosovë dhe ende nuk dihet fati i më shumë se 1.600 të pagjeturve, shënohet 27 Prilli – Dita Kombëtare e Personave të Pagjetur. Zyra e Kryeministrit të Republikës së Kosovës në bashkëpunim me shoqatën “ 27 Prilli 1999 Mejë”, organizon  tubim përkujtimor tek Kompleksi Memorial në Mejë.