Izraeli u hap rrugë krokodilëve për të parandaluar arratisjen

Ministria izraelite e Mjedisit ka bërë një klasifikim të ri për krokodilët gjë që mund t’i lejojë ata të përdoren për detyra sigurie, si ruajtja e burgjeve.

Ministrja izraelite e Mbrojtjes së Mjedisit, Idit Silman, ka bërë një klasifikim të ri për krokodilët. Ky hap mund të bëjë të mundur përdorimin e këtyre reptilëve për detyra sigurie, si ruajtja e burgjeve.

Ministri izraelit ultra i djathtë i Sigurisë Kombëtare , Itamar Ben-Gvir, sipas raportimeve, propozoi në dhjetor përdorimin e krokodilëve rreth një burgu për të ndaluar palestinezët. Ideja i ngjan një qendre amerikane në Florida për ndalimin e migrantëve, e njohur si “Alligator Alcatraz”/lexo shqip: Alkatrazi i Aligatorëve/.

Krokodilët e Nilit, tashmë të riklasifikuar si mjete sigurie

Klasifikimi i ri i vendos krokodilët në kategorinë e «kafshës së egër të kultivuar» (cultivated wild animal), në vend të kafshëve të egra. Kjo mund t’i lejojë një organizate të sigurisë të miratuar të mbajë krokodilë të Nilit për qëllime sigurie, sipas miratimit të qeverisë dhe kushteve të vendosura nga autoritetet mjedisore.

Një prej këtyre organeve është Shërbimi i Burgjeve i Izraelit (Israel Prison Service), i cili i raporton Ben-Gvirit.

Mediat izraelite raportuan se Ben-Gvir synon t’i përdorë krokodilët për të ruajtur burgun Ketziot, në jug të Izraelit, i cili mban kryesisht të burgosur palestinezë  për arsye sigurie.

Në një postim në Facebook të enjten, Ben-Gvir shkroi: «Po mendon të tentosh të arratisesh? Mendoje edhe një herë.» Ai e shoqëroi postimin me një foto të krijuar me inteligjencë artificiale, ku shfaqet vetë me një krokodil të lidhur me zinxhir.

Kritika ndaj përdorimit të krokodilëve

Kanali izraelit 13 raportoi se Autoriteti Izraelit i Natyrës dhe Parqeve (Israel Nature and Parks Authority) e kritikoi propozimin e Ben-Gvirit. Kritika erdhi kur ai e paraqiti idenë për herë të parë vitin e kaluar.

Autoriteti tha se kafshët e egra duhet të mbahen vetëm për qëllime kërkimore dhe edukative.

Ai citoi gjithashtu probleme të mëparshme, kur krokodilë të rritur në robëri ishin arratisur në natyrë, duke rrezikuar jetë njerëzish. Kanali 13 gjithashtu raportoi se ideja “u quajt qesharake nga disa zyrtarë” të Shërbimit të Burgjeve të Izraelit./DW/