Ja kur e shpall vendimin për gjyqtaren e Apelit të Vlorës, KPK…

Komisioni i Pavarur i Kualifikimit pasi zhvilloi një seancë dëgjimore me gjyqtaren e Apelit Vlorë, Brikena Ukperaj (Lubonja) ka vendosur që vendimi të jepet më 25 Qershor.

Trupa gjykuese e përbërë nga Xhensila Pine, Valbona Sanxhaktari, Etleda Çiftja do të shqyrtojë dosjen e gjyqtares bazuar në tre kritere, pasurinë, pastërtinë e figurës dhe aftësimin profesional.

Brikena Ukperaj (Lubonja) është edhe kandidate për Këshillin e Lartë Gjyqësor. Relatorja Etleda Çiftja tha se ILDKPKI ka paraqitur raport pozitiv, gjyqtarja nuk ka fshehur pasurinë dhe nuk ka deklarim të rremë.

“Hetimi u përqendrua në një apartament në Tiranë të blerë në vitin 2012 në Selitë dhe një makinë”, tha relatorja.

Po ashtu është hetuar edhe bashkëshorti për pjesën që i takon prej 50%.

Relatorja Etleda Çiftja tha se ka pasur 12 denoncime nga qytetarët në Komisionin e Pavarur të Kualifikimit. Por sipas relatores, komisioni ka arritur në konkluzionin se denoncimet mund të zgjidhen në rrugë gjyqësore.

Nga ana e saj gjyqtarja Ukperaj tha se është njohur me materialet dhe se i qëndron të gjitha atyre që ka shpjeguar.