Jemi në kontakt me KFOR-in, Kurti: Barrikadat duhet të hiqen menjëherë!

Barrikadat e kriminelëve me maska në veri duhet të hiqen menjëherë, ishte përgjigja e Kryeministrit të Kosovës, Albin Kurti, për forcat serbe në veri të cilat të inkurajuara nga Presidenti i Serbisë Aleksandar Vuçiç, kanë vazhduar përveç se me bllokimin e rrugëve të gjuajnë me armë zjarri Policinë e Kosovës.

“Ka disa ditë që Serbia kërcënon Kosovën me agresion. Presidenti dhe kryeministrja e Serbisë bëjnë thirrje për kthimin e ushtrisë serbe në Kosovë. Një mijë ushtarë thonë, duke u thirrur në Rezolutën 1244 (1999) të KS të OKB-së,” tha Albin Kurti në reagimin e tij duke shtuar se ata duan një kthim të dyfishtë. E para, kthim në kohën e Milosheviçit dhe të luftës; Së dyti, që çështja e Kosovës të kthehet në OKB dhe sa më larg BE-së.

“Si reagim ndaj propozimit të BE-së të mbështetur nga Franca e Gjermania (dhe ShBA-të), duan kthim te KS i OKB-së ku ndodhet vetoja e Rusisë (dhe Kinës). Kosova është shtet evropian, demokratik dhe pro-amerikan. Me këtë udhëheqje që ka, Serbia është autokratike, pro-aziatike dhe luftënxitëse. Ne nuk duam konflikt, ne duam paqe dhe progres, por agresionit do t’i përgjigjemi me gjithë fuqinë që kemi,” shprehet Kurti në reagimin e tij përmes rrjetit social Facebook, tash që as targat e automjeteve dhe as datën e zgjedhjeve nuk mund t’i përdorin si pretekst, strukturat ilegale të Serbisë të shndërruara në banda kriminale u zbuluan në etjen e tyre për zjarr e gjak.

Çdo mosdënim i vendosur nga ana e BE dhe ShBA i kësaj dhune të orkestruar, thekson Kryeministri i Kosovës, Albin Kurti, do të inkurajojë Beogradin zyrtar për më shumë nxitje për destabilizim të Kosovës ndërsa përfundon:

“Ministri i brendshëm Sveçla është në kontakt me Komandantin e KFOR-it Ristuccia. Barrikadat e kriminelëve me maska në veri duhet të hiqen menjëherë. Kosova është vend i qytetarëve të lirë e punëtorë, pa dallim etnie e feje, gjinie e moshe. Kriminelët dhe rusofilët do të dështojnë. Republika e Kosovës do të fitojë.”