Nxitësi i barrikadave, Vuçiç: Do kërkojmë nga KFOR-i të dërgojmë 1000 forca serbe në Kosovë, e di që do thonë JO, por…

Ndone u prit një dalje publike më serioze pas tensioneve që krijoi vetë në Kosovë, Presidenti i Serbisë, Aleksandar Vuçiç sërish i hodhi benzin zjarrit serbë në Veri të Kosovës duke mashtruar me “foto-dëshmi” nga terreni, se si ROSU është futur e armatosur në veri, për të përfunduar duke i dhënë fund dhe mashtrimit të madh me dërgimin e 1000 forcave serbe në Kosovë, që sipas tij, do kërkojë nga KFOR-i edhe pse e dinë që do ti thonë JO, ndonëse tha se beteja vazhdon dhe nuk dorëzohen.

Pa dashje ose me qëllim, nuk dihet, por, ai e bëri të qartë sikur serbët ngritën barrikada me lejen e tij, sepse, siç u shpreh, nuk kishin rrugë tjetër!

“Këtë e bënë njerëzit sepse nuk durojnë më dot zullumin. Çdo ditë kam dëgjuar rrëfime se si ‘Serbia dëshiron dikë të sulmoj’,” tha Vuçiç duke gënjyer pa i lëviz qerpiku ndonëse ishte Kryeministrja, Drejtori i Zyrës për Kosovës, Ministri i Jashtëm, Ministri i Mbrojtjes dhe e gjithë shpurra e tij që fliste se si do të dërgojnë së shpejti 1000 forca serbe në Kosovë, për të mbrojtur popullsinë serbe ndërsa hodhi një shashkë ndër perëndimorët:

“Vazhdoj të mendoj se Amerikanëve nuk u shkon për shtati gjithçka që po ndodhë në Kosovë, por disa të tjerëve po!”

Dhe, gjithë historinë me dërgimin e forcave serbe në Kosovë, ndonëse pritshmëria ishte e madhe dhe rrjetet sociale i bombarduan me video nga më të ndryshmet, se si Ushtria Serbe tashmë është nisur në Kosovë, ai e përfundoi me një tekst që e bëri publik, që sipas tij sapo është harmonizuar, dhe do ti dërgohet KFOR-it në mënyrë që vendosen forcat e ushtrisë dhe policisë serbe në tokën kosovare.

“Me Rezolutën 1244 të KS OKB është konfirmuar që sipas numrit të dakordësuar të ushtarëve serb dhe personelit policor do të lejohet kthimi i tyre. Deri më tani me KFOR-in nuk kishte bisedime për kthimin e personelit serb,” lexoi Vuçiç tekstin e kërkesës drejtuar KFOR-it duke shtuar se nuk ka iluzione se ata do ta refuzojnë kërkesën ndonëse, sipas tij, janë të detyruar ta miratojnë. 

“Kjo nuk është mundësi, por detyrim i KFOR-it,” vazhdoi aktrimin Presidenti i Serbisë duke ju drejtuar popullit serb, por, duke harruar se forcat serbe janë larguar nga toka kosovare po nga ky KFOR sepse kishin kryer krime lufte kundër njerëzimit, jo para 200 por 20 viteve, dhe ende ka varreza masive që shteti serb nuk i ka pranuar se ku janë.

Dhe, pas gjithë asaj katrahurre që krijoi me shpurrën e tij sikur do dërgojnë forcat serbe në Kosovë, ai sot thotë se KFOR-i do gjejë mijëra arsye të thonë se e kanë situatën nën kontroll dhe nuk ka nevojë për forca serbe.

Ky mashtrues patologjik që vetëm Edi Ramën ka mik në këtë botë, hodhi poshtë idenë se Zajednica do jetë pjesë e negociatave përfundimtare kur tashmë plani franko-gjerman është bërë publik, dhe dihet se është hartuar për serbët dhe jo shqiptarët sepse ata kanë Planin e Ahtisarit.

“Kur Zajednica të plotësohet, nuk mund të jetë conditio sine qua non për ti dhënë diçka të re Prishtinës. Ky është detyrim i Prishtinës për diçka që Beogradi e ka plotësuar,” tha Vuçiç duke rikujtuar parimet juridike pacta sunt servanda por duke gënjyer për një Marrëveshje që nuk e ka plotësuar në asnjë pikë, përveç atyre që detyroi Washingtoni dhe BE duke lënë gjurmë sikur ka tolerime, por Presidenti i Serbisë vazhdoi me aktrimin:

“Ndoshta jam trap, i çmendur ose i dehur, por, për diçka jam i sigurtë, Prishtina dhe BE kanë firmosur marrëveshjen e Brukselit dhe duhet ta zbatojnë,” tha Vuçiç dhe sulmoi ashpër ministrin e ri të Komuniteteve dhe këshilltaren e tij.

“Ata nuk shkojnë tek serbë sepse nuk i duan, dhe nuk përfaqësojnë serbët, por, regjimin okupator të Albin Kurtit i cili dërgon njësinë speciale të arrestoj dhe vras serbë,” tha Presidenti i Serbisë me gjuhën e trapit, të çmendurit dhe të dehurit, por, jo dhe të njeriu që mund të flas për marrëveshje dhe paqe.

Në fund, Vuçiç e dha edhe një lajm për të cilin nuk ishin në dijeni shqiptarët, pa e kuptuar se është lajm i jashtëzakonshëm për shqiptarët sepse ishte i përqëndruar tek shkelja që po i bëhet Marrëveshjes së Washingtonit.

“Prishtina, më 15 Dhjetor zyrtarisht do të dorëzoj kërkesën në Bruksel për anëtarësim në Bashkimin Evropian. Kjo për ne është një ngjarje e pakëndshme. Kjo është shkelje e Marrëveshjes së Washingtonit. Këtë do ta bëjnë me paralajmërim të fortë dhe pompozitet. Atje do të pranohen, e unë sot i kam dërguar letër presidentëve dhe kryeministrave të pesë vendeve anëtare të BE që nuk e kanë njohur pavarësinë e Kosovës, sepse bazuar në Nenin 49 të Marrëveshjes, anëtarësimin mund të kërkojnë vetëm shtetet e pavarura, e jo ato që nuk janë dhe nuk i pranon më shumë se gjysma e botës,” tha Aleksandar Vuçiç duke harruar se ishte Serbia ajo që shkeli Marrëveshjen e Washingtonit dhe u angazhua me atë që ata e quajnë ç’njohje të Kosovës dhe duke përçmuar dhe popullin e vetë serbë sikur nuk e dinë se sa shtete i ka bota!