“Kam fituar në baste 79.275 euro”, KPK shkarkon Prokurorin e Vlorës

Komisioni i Pavarur i Kualifikimit, KPK, ka shkarkuar prokurorin e Vlorës, Alfred Sali, pas problemeve të konstatuara në kriterin e pasurisë.

Gjatë seancës dëgjimore KPK foli për mosdeklarim të mbajtjes cash të një shumë prej 79 mijë eruosh që Alfred Sali pretendoi se i kishte fituar nga një kompani bastesh, por Komisioni i kishte kaluar prokurorit barrë prove mbi dyshimet për “deklarim të rremë”, ndërsa përfshirja e tij në baste u cilësua si cënim i integritetit. KPK theksoi se Sali rezultoi me bilanc negativ sa i përket mundësisë për të dhënë një hua 58 mijë euro babait të tij me burim shumën e pretenduar të fituar në bastet sportive por prokurori i Vlorës e kundërshtoi duke theksuar se kishte sjellë prova të mjaftueshme.

Ai pretendoi se fitimi i shumës prej 79.275 euro në bastet sportive onlinë bet 355 me seli në Gilbraltar, nuk ishte një aktivitet në kundërshtim me ligjin dhe as me kodin e etikës ndonëse e pranoi se nëse kthehej pas në kohë nuk do ta përsëriste.

Ndryshe, trupa e KPK që hetoi prokurorin Alfred Salin kryesohej nga Xhensila Pine, relator Olsi Komici dhe anëtare Valbona Sanxhaktari.