Kaosi në Kosovë ka emër, për 25 vjet – nga 64% pjesëmarrje në 63% mospjesëmarrje në zgjedhje!

Kur dështuan bisedimet e djeshme për krijimin e institucioneve të reja në mes të Kryetarit të Lëvizjes Vetëvendosje, Albin Kurti, dhe, atij të Lidhjes Demokratike të Kosovës, LDK, Lumir Abdixhiku, Kryetari i LDK e bëri të qartë se janë shumë larg marrëveshjes dhe nuk ka dakordësi për zgjedhjen e Presidentit.

“Sot duhet të ketë seancë dhe duhet të konstituohet Kuvendi. Nuk duhet të futemi në paqartësi kushtetuese. LDK ka kërkuar që presidenti të propozohet nga Lidhja Demokratike e Kosovës, natyrisht që emrat të diskutohen me partnerin tonë. Dhe në këtë pikë nuk kemi pasur dakordancë,” tha Lumir Abdixhiku duke e bërë të qartë që qëllimi i tij dhe i LDK-së ka qenë të gjendet zgjidhja.

Kryetari i Lëvizjes Vetëvendosje, Albin Kurti, vazhdoi me demagogjinë që e filloi shkurtin e vitit të kaluar dhe po e vazhdon edhe pas dy dështimeve të panevojshme të zgjedhjeve parlamentare, duke deklaruar se preferenca e parë e LVV-së është që kandidati për President të jetë konsensual, dhe, nëse nuk mund të gjendet një emër i tillë atëherë kalohet tek Presidenti partiak, pra, LVV e merr vetë.

Se si e merrë vetë nuk e kuptoi njeri, por qytetarët e Kosovës që përjetuan të kishin edhe President pa lidhje si Atifete Jahjaga, ashtu siç vepruan gjatë rrugëtimit të tyre nga Ibrahim Rugova deri tek Vjosa Osmani vepruan edhe sot duke vendosur ta braktisin këtë klasë politike që vetëm për Kosovën nuk po mendon; Duke mos u entuziazmuar as me seancën konstituive që propaganda e LVV e futi në centrifugë kushtetuese, sot bënë që bënë më 7 Qershor kur u mbajtën zgjedhjet e treta parlamentare pa zgjidhur asgjë, qytetarëtr iu drejtuan bregdetit shqiptar pa e trazuar Albinin që të vazhdoj të mendoj me shpurrën e tij se kërthiza e Kosovës do jetë, Parlamenti!

Dhe jo vetëm kaq! Arsyeja që Albin Kurti me LVV-në e tij nuk ia jep postin e Presidentit, LDK-së, është se ka vetëm 18 ulëse në parlament!

“Kemi ofruar pozitën e Zv/Kryeministrit me disa ministri. E di që kohëve të fundit është përdorur togfjalëshi balanc demokratik, por brenda sistemit tonë kemi balanc demokratik dhe kemi një zonë zgjedhore. Ne ofrojmë në përputhje me rezultatin ta ndajmë përgjegjësinë me resorë ministrore në ekzekutiv,” tha Albin Kurti duke e konsideruar këtë ofertë si ofertë për bashkëqeverisje që reflekton rezultatin e zgjedhjeve, ndërsa për kërkesën e LDK-së për President, lideri i LVV tha se partia e Abdixhikut nuk i ka as 30 vota për ta bërë propozimin në Parlament.  

Pas dy zgjedhjeve të dështuara, kur Abdixhikut i mungojnë 12 deputetë që LDK ta bëjë propozimin për President në Parlament, dhe Albinit 18 deputetë që LVV ta zgjedhë vetë Presidentin, Albin Kurti na thotë se Lidhja Demokratike ka PAK ulëse në Parlament, vetëm 18!

Pak, kjo është e vërtetë, por kandari politik i Kosovës tregon se as Albini nuk ka SHUMË, por, i ka 18% të votave të qytetarëve të Kosovës, ose 53% ulëseve në parlament nga 36.88% e qytetarëve që morën pjesë në zgjedhjet e 7 Qershorit!

Kryetari i LVV-së, Albin Kurti, dje duke e përsëritur disa herë se nuk është për zgjedhje të reja nuk entuzizmonte dot as gazetarët që u mësuan me demagogjinë e tij, por, ai vazhdoi.

“A ka dikush prej juve që i do zgjedhjet e reja? Më lejoni që t’ju pyes edhe unë më në fund njëherë. Pyetja ime ishte shumë konkrete, i nderuari gazetar. A ka dikush prej juve që dëshiron zgjedhje të reja?”

Asnjëri prej gazetarëve që pritën kot para Kuvendit, përfundimin e takimit Kurti-Abdixhiku, nuk foli ndërsa lideri i LVV, vazhdoi:

“Askush pra!”

Nata nuk solli asgjë të re, sot, shqiptarët panë sërish një seancë të turpshme ku Albin Kurti kërkoi kohë shtesë për të dytën herë për të arritur një marrëveshje ndonëse i ka votat për të votuar konstituimin e Parlamentit dhe Kryetarin e ri.

“Prandaj insistimi ynë i drejtë është që të ulemi, të bisedojmë, të merremi dhe vetëm nga lartësia e një marrëveshjeje politike dhe nga gjerësia e një marrëveshje mes meje dhe liderët e partive të tjera parlamentare, të konstituojmë Kuvendin, Qeverinë dhe ta zgjedhim presidentin,” tha Albin Kurti qartësisht i painteresuar për zgjedhjen e Presidentit me aleatët dhe duke gjuajtur grepin në fushatën për zgjedhjet parlamentare të radhës, pasi LDK nuk është e interesuar për një aleancë qeverisëse pa postin e Presidentit ndërsa PDK është edhe më e qartë, do shkon në opozitë dhe nuk është e interesuar për asnjë lloj marrëveshje me njeriun me të cilin humbi shumë kohë për shpëtimin e vendit në dy zgjedhjet e kaluara.

Në fund, pavarësisht se çfarë bluan Albin Kurti në kokën e tij, dhe çfarë e këshillojnë kokat si analfabeti funksional Hekuran Murati, qytetarët e shtetit më të ri në Evropë që për Presidente kishin edhe Atifete Jahjagën, çështjen e Presidentit e kanë të zgjidhur sikur Albini t’ia arrinë qëllimin e t’i mbanë zgjedhjet sërish në muajin dhjetor; Ata do të marrin malin në ditën e votimit duke e lënë pjesëmarrjen në rënie të lirë, ndërsa Kryeministrin në detyrë të mburret se sa e madhe ishte pjesëmarrja në 7 Qershorin e vitit 2026!

Sepse, në këtë kaos që është katandis Kosova, ku partia fituese LVV nuk do t’ja dijë për asgjë tjetër në botë përveç se për pushtetin, ndërsa partitë opozitare, PDK, LDK dhe Aleanca, nuk po e kuptojnë se cila është detyra e opozitës, është e qartë se çështja madhore për qytetarin nuk është nëse Presidenti do jetë nga LDK apo LVV, por si do të ndryshon kur kjo klasë politike të cilën deri më sot, qartësisht e ka dënuar me votë për 25 vjet, ku nga 64% pjesëmarrje në zgjedhjet parlamentare sot kemi 63% mospjesëmarrje të qytetarëve të Kosovës, dhe nuk asnjë shenjë përmirësimi; Ndërsa ata që kanë lindur 25 vjet më parë, vit kur u mbajtën zgjedhjet e para parlamentare në Kosovën e lirë, po shohin me trishtim se ky kaos politik ka emër përderisa e ardhmja e vendlindjes së tyre varet nga një 79 vjeçar që merrë urdhëra me celular, se si ta përdhosë në mënyrë sa më makabre seancën konstituive të parlamentit të ri!

Dhe, përveç se me hakërrimën e Ali Asllanit, nuk kanë se si ta kuptojnë ndryshe indinjatën e të gjithë atyre deputetëve që panë shefin e tyre duke iu përplasur vezët opozitare në surrat, ndonëse këtë lloj opozitarizmi e shpiku po ky njeri!

“As ju hahet, as ju pihet, vetëm titulli ju kihet…
Teksa fshat’ i varfër digjet… kryekurva nis e krihet!”