Kompleksi Partizani/ GJKKO, masë sigurie për Sali Berishën, pranga për Jamarbër Malltezin

Gjykata e Posaçme e Shkallës së Parë për Korrupsionin dhe Krimin e Organizuar, GJKKO, ka vendosur ndaj Kryetarit të PD Sali Berisha, masën e sigurisë “detyrim paraqitje”, si edhe u bllokua pasaporta e tij në kuadër të hetimeve të SPAK për privatizimin e kompleksit Partizani në Tiranë.

Ndërkohë dhëndri i Berishës, Jamarbër Malltezi u arrestua sot nga policia në Aeroportin “Nënë Tereza” në Rinas, ku po priste bashkëshorten e tij që po kthehej nga Gjermania.

Masat e sigurisë i janë kërkuar GJKKO-së nga prokurorët e SPAK, Arben Kraja dhe Enkeleda Millonai.

Berisha dhe Malltezi akuzohen për korrupsion, pastrim parash dhe fshehje e deklarim të rremë të pasurisë. Po ashtu në pranga ka përfunduar edhe ndërtuesi Fatmir Bektashi, i përfshirë në ndërtimet e pallateve në zonën ku ndodhej kompleksi sportiv Partizani.

Ndryshe, në vitin 2020 ishte ministri i Brendshëm, Taulant Balla, asokohe kreu i grupit parlamentar të PS, ka paditur, Ish-Presidentin Sali Berisha, Ish-Ministrin e  Mbrojtjes, Arben Imami, dhe anëtarë të tjerë të qeverisë së drejtuar nga Berisha, Jamarbër Malltezi si përfitues direkt i kësaj prone si dhe drejtues të shtabit të ushtrisë shqiptare bashkë me administratorët dhe aksionerët e dy kompanive ndërtuese në kompleksin “Partizani”.