Konferenca e Kryetarëve, Bardhi-Peleshit: Po e nis Kuvendin në shkelje të Kushtetutës! 

Mbledhja e Konferencës së Kryetarëve përpara nisjes së sesionit të ri parlamentar u shoqëruar me diskutime mes maxhorancës dhe opozitës, ku kreu i Grupit Parlamentar të PD-së, Gazment Bardhi, e akuzoi Kryetarin e Parlamentit Niko Peleshi, se po e nis Kuvendin në shkelje të Kushtetutës për shkak se sesioni i ri duhet të niste ditën e nesërme, dhe jo sot.

“Ju jeni Kryetari i Kuvendit i vetmi në histori që konsideroni më të rëndësishëm zbatimin e një akti qeveritar sesa Kushtetutën. Në hierarkinë e normave ju nuk vendosni Kushtetutën e Shqipërisë, por urdhrat e Këshillit të Ministrave.

Na folët këtu se si do të jetë sesioni i ri parlamentar, por ju po e nisni këtë sesion duke shkelur Kushtetutën,” tha Kryetari i Grupit Parlamentar të PD-së, Gazment Bardhi, duke përfunduar:

“E mbyllët sesionin e kaluar duke shkelur Kushtetutën, tani po e nisni me shkelje kushtetuese. Do të duhej që ky Kuvend ta niste sesionin nesër. Po ju nuk jeni serioz, nuk e njihni Kushtetutën.”