Konflikti për pazaret e drogës, shefi i krimeve të rënda planifikonte vrasjen e dy vëllezërve shqiptarë në Britani

Pas 11 urdhër arresteve që janë lëshuar nga SPAK për anëtarët e dyshuar të një grupi kriminal i cili u zbulua me zbardhjen e bisedave në aplikacionin SKY Ecc ku janë të përfshirë zyrtarë dhe ish-zyrtarë të lartë të policisë së Shtetit, zbulohen detaje të reja.

Shefi i Krimeve të Rënda, Dedan Gjoni në bashkëpunim me personazhin e njohur të krimit në Kukës, Bujar Gërmizi (Ajeti) dhe shtetasin Besmir Murati, raporton BW, po planifikonin vrasjen e dy vëllezërve në Britani.

Raportohet se shkak është përplasja për trafikun e drogës dhe se ky operacion i SPAK po zhvillohet paralelisht edhe në Spanjë për kapjen e autorëve të dyshuar të grupit kriminal.

Mësohet se Bujar Gërmizi është shoqëruar nga Kukësi drejt Policisë së Drejtorisë së Tiranës nën masa të rrepta sigurie.

Një tjetër persona i rëndësishëm i trafikut të drogës është Ervin Mata, i cili është shpallur në kërkim. Operacioni është duke vijuar edhe në shtetin e Spanjës. Mbrëmë u arrestua Erzen Breçani, ish-drejtori i Policisë së Tiranës. Ai ka lidhje krushqie me Matën, pasi djali i tij ka partnere motrën e Matës, raporton BW ndërkohë ka dyshime dhe për pastrim parash.

E përfshirë në këtë grup kriminal dyshohet se është oficerja e drejtorisë së kufirit dhe migracionit, Jonida Babameton, ndaj të cilës është caktuar masa ‘detyrim paraqitje’.