Korrupsion e pastrim parash, SPAK me akuza të reja për ish-kreun e SHISH, Vlora Hyseni

Pozita e Ish-Drejtores së Shërbimit Informativ Shtetëror, Vlora Hyseni, sa shkon e rëndohet më shumë, tashmë kur hetimet e SPAK janë zgjeruar. Krahas çështjeve për të cilat po hetohej më parë, Prokurorisë së Posaçme ka regjistruar akuza të reja ndaj saj, që lidhen me dyshimet për korrupsion dhe pastrim parash.

SPAK po verifikon një transfertë në një kompani ku është i punësuar vëllai i Vlora Hysenit, Izet Dingler. Ndërkohë po verifikohen edhe disa listpagesa që janë gjetur në zyrën e EATABACCO të Ergys Agasit, raporton BW.

Ndryshe, Ish-Drejtorja e SHISH, është nën hetim nga Prokuroria e Posaçme në kuadër të dosjes së AKSHI-t, ku dyshohet për përfshirje në veprimtari që lidhen me biznesmenin Ergys Agasi. Ndaj saj më parë ishin ngritur dyshime veprat penale “Përkrahja e autorit të krimit” dhe “Zbulimi i akteve ose të dhënave sekrete”.

Në fokus të hetimeve është dyshimi se Vlora Hyseni ka ndihmuar biznesmenin Ergys Agasi gjatë kohës që ai ndodhej në arrati, duke i vënë në dispozicion informacione konfidenciale shtetërore. Prokurorët po verifikojnë komunikimet dhe marrëdhëniet mes tyre, si dhe nëse informacionet e përcjella nga Hyseni kanë ndikuar në shmangien e Agasit nga autoritetet ligjzbatuese.

Ish-Drejtorja e Shërbimit Informativ Shtetëror, Vlora Hyseni u vu nën masën e sigurisë “arrest në shtëpi” më 21 shtator 2026, me vendim të GJKKO. Përveç arrestit në shtëpi, ndaj saj u vendos edhe masa e pezullimit nga ushtrimi i funksioneve publike.

Më 4 nëntor 2026, Gjykata e Posaçme e Apelit la në fuqi masën e sigurisë, duke rrëzuar kërkesën e saj për ndryshimin e saj.