“Kosova po pret”, Hamza: Ish-krerët e UÇK-së në Hagë nuk janë vetëm!

Duke filluar prej sot ka nisur numërimi mbrapsht drejt 16 shtatorit, datës kur pritet të shpallet vendimi përfundimtar ndaj katër ish-krerëve të Ushtrisë Çlirimtare të Kosovës në Hagë, tha Kryetari i Partisë Demokratike të Kosovës, Bedri Hamza, në aktivitetin e organizuar nga platforma “Liria ka Emër” në Prishtinë me moton “Kosova po pret”, ku u vendos dhe “Ora e pritjes”, një ekran që simbolizon numërimin deri në datën e vendimit.

“Koha po ecën. Pritja tashmë është shkurtuar, por kujtesa jonë nuk shkurtohet. Përkundrazi, sa më shumë afrohet dita, aq më zëshëm duhet të themi atë që kemi për të thënë. Dhe sot jemi këtu për ta filluar numërimin së prapthi. Çdo ditë që kalon, çdo orë që është drejt fundit, çdo minutë që numërohet do të na kujtojë se 16 shtatori po afrohet,” tha Bedi Hamza duke bërë të ditur se ekrane të ngjashme do të vendosen edhe në qytete të tjera të Kosovës, si simbol i pritjes së vendimit.

“Janë një mesazh për familjet që presin, janë mesazh për ata që janë në Hagë dhe janë mesazh për të gjithë botën që Kosova nuk harron,” tha Bedri Hamza duke theksuar se Kosova nuk harron kontributin e tyre në çlirimin dhe shtetndërtimin e Kosovës, duke përfshirë luftën e UÇK-së, procesin e negociatave në Rambuje dhe ndërhyrjen e NATO-s.

“Ata që dikur numëronin ditët deri te liria, sot padrejtësisht i numërojnë ditët brenda mureve të izolimit në Hagë,” tha Kryetari i PDK, Bedri Hamza, duke përfunduar me mesazhin e qytetarëve të Kosovës për katër ish-krerët e UÇK-së.

“Hashim Thaçi, Kadri Veseli, Jakup Krasniqi, Rexhep Selimi dhe bashkëluftëtarët e tyre që po mbahen në Hagë, nuk janë vetëm. Pas tyre janë familjet, bashkëluftëtarët, miqtë dhe një popull i tërë që nuk i harron. Nga Prishtina në çdo komunë, nga sheshet në lagje, le ta bëjmë këtë numërim të dukshëm. Sepse, një popull që kujton, nuk lejon që historia e tij të rishkruhet. Të bëhemi bashkë të gjithë. Ndryshe për politikën, por bashkë për Kosovën. Bashkë të marshojmë më 12 shtator. Bashkë t’i presim më 16 shtator.”