Kosova pranon flamurin e Lojërave Mesdhetare, Rama: Drejt Prishtinës 2030

Kosova do ta mirëpresë Mesdheun me krenari, tha Kryetari i Komunës Prishtinë, Përparim Rama, pas ceremonisë mbyllëse të Lojërave Mesdhetare Taranto 2026, ku Kosovës iu dorëzua zyrtarisht flamuri i Lojërave Mesdhetare, në shenjë të kalimit të organizimit te Prishtina 2030.

“Sonte në Taranto e pamë të ardhmen dhe zemra na rrahu për Prishtinën. Nga Taranto 2026, drejt Prishtinës 2030, aty ku ëndrra jonë do të marrë jetë dhe Kosova do ta mirëpresë Mesdheun me krenari! Po vjen koha jonë. Po vjen Prishtina 2030!,” shprehet Përparim Rama në reagimin e tij pas një momenti shumë emocionues.

Komiteti Olimpik i Kosovës bëri të ditur se flamurin e Lojërave Mesdhetare e pranoi Kryetari i Komunës Prishtinë, Përparim Rama, në ceremoninë e mbajtur në Taranto, duke shënuar zyrtarisht kalimin e organizimit të organiztaorit të ardhshëm, Prishtina.

Ceremonia u zhvillua para më shumë se 20 mijë shikuesve, ndërsa flamuri i Kosovës u ngrit përkrah flamurit të Italisë dhe atij të Lojërave Mesdhetare.

Flamuri i Kosovës u dorëzua nga basketbollisti Adhurim Alijaj, ndërsa ngritja e tij u shoqërua me intonimin e himnit shtetëror të Kosovës.

Në stadium u shfaq edhe videoja promovuese e “Prishtina 2030”, përmes së cilës u prezantua para publikut mesdhetar organizatori i ardhshëm i Lojërave.

Para ceremonisë së dorëzimit të flamurit, Kosovën në ceremoninë mbyllëse të “Taranto 2026” si flamurmbajtës u përfaqësuan karateisti Islam Selmani dhe Fortesa Orana.

Në stadium ishin të pranishëm edhe drejtuesit e Komitetit Olimpik të Kosovës, me presidentin Ismet Krasniqi.

Me dorëzimin e flamurit, Prishtina zyrtarisht merr stafetën për organizimin e Lojërave Mesdhetare të vitit 2030.